Լոնդոնի Բրունելի համալսարանի գիտնականները փորձ են կատարել, որի արդյունքում պարզել են, թե երաժշտության տարբեր տեսակները ինչ ազդեցություն են ունենում վարորդի հոգեբանության վրա, հայտնում է Transportation Research ամսագիրը:
Փորձի մասնակիցներ 34 չափահաս վարորդներ են եղել, որոնց խնդրել են նստել վարորդական սիմուլյատորի ղեկին: Ծրագրվորվել է քաղաքային ճանապարհների իմիտացիա եւ կոնկրետ երթուղի: Աստիճանաբար մասնագետները միացրել են տարբեր ձայներ` քաղաքի երթեւեկության աղմուկ, խոսակցական լեզու, հանգիստ կամ բարձր երաժշտություն՝ տեքստով եւ առանց տեքստի:
Մոդելավորումը տեւել է մոտ 8 րոպե, որի ընթացքում վարորդները բախվել են 5 տարբեր խոչընդոտների: Օրինակ, բեռնատարի, որին պետք է վազանցել կամ կարմիր լուսացույցի:
Որոշ ժամանակ անց պարզվել է, որ ձայնի տեսակները գրեթե չեն ազդում վարորդի ռեակցիայի եւ հոգեբանության վրա: Բայց գիտնականները նկատել են, որ 75 դեցիբել ձայնի դեպքում զգացմունքային գրգռվածությունն աճում է գրեթե 37 տոկոսով, ինչը կարող է խանգարել անփորձ վարորդին:
Ուստի հոգեբանները խորհուրդ են տալիս առանց ձայնի ավելորդ էֆեկտների հանգիստ երաժշտություն լսել՝ հոգեկան վիճակը օպտիմալացնելու համար, ինչը չափազանց կարեւոր է սթրեսային քաղաքային միջավայրում վարելիս: