Մի կողմից ցանկանում եմ շնորհավորել բոլորիս Անկախության օրը, բայց այն պայմաններում, որում գտնվում ենք հիմա եւ եւ դիմավորում այդ տոնը՝ «շնորհավորել» բառն, իսկապես, դժվարանում եմ օգտագործել: Այս մասին, այսօր՝ սեպտեմբերի 21-ին, «Եռաբլուր» պանթեոնում ասաց ԱԺ «Հայաստան» խմբակցության պատգամավոր Արամ Վարդեւանյանը:
Նրա խոսքով՝ այն մարտահրավերները, որոնք այսօր կանգնած են մեր պետության առաջ, երբեւէ նախկինում չեն եղել, չի եղել նաեւ Անկախության օրվա ներկայիս խորհուրդը:
«44-օրյա պատերազմը, մեկ տարվա այս արհավիրքը, որով անցել է հայ ժողովուրդը հազարավոր հերոս տղերքի մարտիրոսման պայմաններում՝ դժվար է խոսել տոնի մասին: Ես կարծում եմ, որ մեր հասարակության մեջ գերակայող տրամադրությունն հենց սա է»,-շեշտեց պատգամավորը:
Վարդեւանյանը համոզմունք հայտնեց, որ հայկական ավանդական մտածելակերպով, առնվազը մեկ տարի պետք է պահվեր տեղի ունեցած ողբերգական իրադարձություններից հետո, որոնք նա որակեց միջազգային հանցագործություններ հայ ժողովրդի եւ ազգի զինվորների նկատմամբ:
«Օրվա խորհուրդն ու տարամաբնությունն է հուշում, որ պետք է լինել Եռաբլուրում»,-հայտարարեց Արամ Վարդեւանյանը:
Պատասխանելով լրագրողի դիտարկմանը, որ զոհվածների ծնողների անհամաձայնության պայմաններում էլ իշխանությունները չհրաժարվեցին գունագեղ տոնակատարությունից՝ «Հայաստան» խմբակցության պատգամավորը նկատեց, որ այդ հարցը պետք է ուղղել իշխանություններին, իսկ ինքը կարծում է, որ այն բոլոր ծախսերը, որ կատարվեցին, կարող էին ուղղվել լրիվ այլ նպատակով: