Անհասկանալի է, թե ինչու Կառավարության օրենսդրական նախաձեռնությունը հնարավոր չէր ներկայացնել ավելի վաղ, որպեսզի մարդիկ ժամանակ ունենային պատրաստվել տեղական ինքնակառավարման մարմինների առաջիկա ընտրություններին: Այս մասին այսօր՝ սեպտեմբերի 22-ին, ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության մշտական հանձնաժողովի նախաձեռնած լսումների ժամանակ «Վարչատարածքային բաժանման մասին» օրենքում եւ հարակից օրեննքերում փոփոխություններ եւ լրացումներ կատարելու մասին օրինագծերի փաթեթի քննարկման ընթացքում ասաց «Հայրենիք» կուսակցության անդամ Բաբկեն Հարությունյանը՝ դիմելով տարածքային կառավարման եւ ենթակառուցվածքների նախարարի տեղակալ Վաչե Տերտերյանին:
Համայնքները, ինչպես նկատեց ընդդիմադիրը, փոփոխությունների ընդունումից հետո, ըստ էության, ենթարկվելու են արմատական փոփոխությունների: «Համայնքների խոշորացման նախագիծը Ազգային ժողով է ներկայացվել տեղական ինքնակառավարման մարմինների ընտրություններից երկու ամիս առաջ: Հարկ է նշել, որ ընտրություններ են նախատեսվում ապագա խոշորացված համայնքներում»,-ասաց Հարությունյանը:
Հետո հետաքրքրվեց, թե ինչ սկզբունքով է որոշվել որոշ համայնքներ խոշորացնել մարզային սկզբունքով, իսկ մյուսները`կլաստերային համակարգով:
Նա փոխնախարարին կոչ արեց պատասխանել`չփորձելով հեռանալ թեմայից: Սակայն փոխնախարարը չլսեց այդ կոչը: Առաջին հարցին Տերտերյանը ընդհանրապես չանդրադարձավ:
Անդրադառնալով որոշ համայնքների խոշորացման որոշմանը`ըստ մարզային սկզբունքի, իսկ մյուսները` ըստ կլաստերային համակարգի, փոխնախարարը միայն վստահեցրեց, որ այս կամ այն բնակավայրերի առանձնահատկությունները լիովին հաշվի են առնվել:
