ՌԴ նախագահ Վլադիմիր Պուտինը նորմալ կյանք է վարում ինքնամեկուսացման պայմաններում, այդ թվում՝ աշխատում է, ասել է պետության ղեկավարի մամուլի քարտուղար Դմիտրի Պեսկովը, փոխանցում է «ՌԻԱ Նովոստի»-ն:
«Նրա սովորական կենսաձեւն է, իհարկե, այն փոխելու ոչ մի պատճառ չկա»,- ասել է Պեսկովը՝ պատասխանելով լրագրողների հարցին, թե ինչպես է նախագահի ինքնամեկուսացումն ընթանում կենցաղային իմաստով, մասնավորապես՝ արդյոք Պուտինը շարունակում է գնալ լողավազան եւ զբաղվել սպորտով: Նրա խոսքով՝ «ինքնամեկուսացումը պայմանական սահմանափակում է»:
«Միեւնույն է, նախագահը միշտ անհրաժեշտ կապի միջոցներով է՝ ամենօրյա, ամենամսյա փաստաթղթաշրջանառությամբ, կապի փակ գծերով, ինչպես նաեւ՝ զեկույցներով, որոնք նա ստանում է ամեն ժամ կամ ամեն րոպե այդ հաղորդակցության գծերով»,- նշել է Պեսկովը:
Սեպտեմբերի 14-ին Պուտինը հայտարարեց որոշ ժամանակով ինքնամեկուսացման ռեժիմի անցնելու որոշման մասին՝ իր շրջապատում կորոնավիրուսով հիվանդների պատճառով: Ավելի ուշ նա պարզաբանեց, որ իր միջավայրում մի քանի տասնյակ մարդ հիվանդացել է կորոնավիրուսով: Ինչպես ավելի վաղ հայտնել էր Պեսկովը, նախագահն իրեն հիանալի է զգում, սակայն այս շաբաթ նրա մասնակցությամբ միջոցառումները հիմնականում կանցկացվեն տեսաժողովների ռեժիմով:
