Ռուսաստանի եւ Թուրքիայի նախագահներ Վլադիմիր Պուտինի եւ Ռեջեփ Թայիփ Էրդողանի հանդիպումը կլինի անձամբ, չնայած որ Ռուսաստանի պետության ղեկավարը շարունակում է մնացած բոլոր իրադարձությունները անցկացնել տեսակապի ռեժիմով, ասել է նրա մամուլի քարտուղար Դմիտրի Պեսկովը, հաղորդել է Ինտերֆաքս-ը:
Լրագրողների հետ հարցազրույցում նա հաստատել է, որ չորեքշաբթի (սեպտեմբերի 29-ին) նախատեսված Էրդողանի այցի նախապատրաստական աշխատանքները շարունակվում են:
Նրա խոսքով՝ առաջնորդները քննարկելու են որոշ միջազգային հարցեր: «Քննարկելու են տարածաշրջանային խնդիրներ: Կարծում եմ, որ առաջին հերթին օրակարգում կլինի Սիրիան, իհարկե՝ Աֆղանստանը, Լիբիայի եւ միջազգային այլ հարցերի շուրջ կարծիքների ավանդական փոխանակումը», - ասել է Պեսկովը:
Նա նաեւ նշել է, որ նախագահները քննարկելու են նաեւ երկկողմ հարաբերություններում ընդհանուր գործերը՝ ներառյալ համատեղ նախագծերը տնտեսության ոլորտում: «Այս հարաբերությունների օպերատորները շատ են: Դրանով հետաքրքրված են երկու երկրների ընկերությունները: Նախագահները միշտ քննարկում են դա»:
Պեսկովը հերքել է այն տեղեկությունները, թե Էրդողանի հետ միասին Պուտինի հետ բանակցություններին չորեքշաբթի մասնակցելու է նաեւ նրա իրանցի գործընկեր Իբրահիմ Ռաիսին:
