Իսպանական Պալմա կղզում (Կանարյան կղզիներ) ժայթքող հրաբխի լավան արդեն ոչնչացրել է մոտ 600 շենք։ Այս մասին երեքշաբթի Թվիթերում տեղեկացրել է Կանարյան կղզիների Հրաբխագիտության ինստիտուտը։

«589 շենք ոչնչացել է, 258 հա ծածկվել է լավայով, 21 կիլոմետր ճանապարհ քանդվել է»,- նշվում է հրապարակման մեջ։

Սեպտեմբերի 19-ին Պալմայում ժայթքեց հրաբուխը Էլ Պասո բնակավայրի մոտ։ Հրաբխի խառնարանից արտանետվում է ակտիվ հրաբխանյութ։ Անվտանգության նկատառումներով տարհանվել է ավելի քան 6 հազար մարդ։ Առայժմ ոչ ոք չի տուժել։

Հիմա իշխանությունները սպասում են, թե երբ լավայի հոսքը կհասնի Պալմայի ծովափին։  Շիկացած հրաբխազանգվածի շփումը աղի ջրի հետ կարող է առաջ բերել պայթյուններ եւ վնասակար գազերի արտանետումներ։ Ներկա պահին լավան ծովափից հեռու է 800-1000 մետր։

Տեղի հեռուստաալիքների ցուցադրած կադրերում կարելի է տեսնել, թե ինչպես է լավայի հոսքը  դանդաղ շարժվում դեպի օվկիանոս՝ ճանապարհին ջնջելով ամեն ինչ։ Հրաբխի խառնարանից բարձրանում է ծխի մեծ սյուն։ Չնայած Կանարյան կղզիների բոլոր օդանավակայանները հիմա աշխատում են, ավելի վաղ Binter Canarias ավիաընկերությունը դադարեցրել էր թռիչքները դեպի Պալմա։