Պալմա կղզում (Կանարյան կղզիներ) ժայթքած հրաբխի լավայի հոսքը հասել է օվկիանոսին Տասակորտե բնակավայրի մոտ։ Այս մասին չորեքշաբթի տեղեկացրել է El País թերթը՝ հղում կատարելով Տասակորտեի քաղաքապետ Խուան Միգել Ռոդրիգեսին։

Տեղեկացվում է, որ լավայի շփումը աղի ջրի հետ առաջ է բերել վնասակար գազերի արտանետումներ։ Ինչպես հավաստիացրել է EFE գործակալությունը, լավան սկսել է հոսել ջրի մեջ մոտ 100 մետր բարձրությամբ բարձունքից, որը գտնվում է ծովափի մոտ։ El País թերթի տվյալներով՝ տեղի իշխանություններն արգելել են նավերին դուրս գալ 4 կիլոմետր հեռավորությամբ ջրատարածք՝ անվտանգության նկատառումներով, տեղեկացնում է ՏԱՍՍ-ը։

Ավելի վաղ Կանարյան կղզիների հրաբխագետները նախազգուշացրել էին պայթյունի հնարավորության մասին, եթե լավան շփվեր ջրի հետ։

Սեպտեմբերի 19-ին Պալմա կղզում ժայթքեց հրաբուխ Էլ Պասո բնակավայրի մոտ։ Հրաբխի խառնարանից տեղի է ունենում հրաբխանյութերի ակտիվ արտանետում։ Լավայի հոսքերը արդեն ոչնչացրել են մոտ 600 շենք, անվտանգության նկատառումներով տարհանվել է մոտ 6 հազար մարդ։ Առայժմ ոչ ոք չի տուժել։