Շվեդիայի իշխանությունները չորեքշաբթի օրվանից հանում են կորոնավիրուսի համավարակի պատճառով մտցված գրեթե բոլոր սահմանափակումները, տեղեկացնում է ՏԱՍՍ-ը։
«Զարգացումն ակնհայտորեն ընթանում է ճիշտ ուղղությամբ, դրա համար այժմ լավ հնարավորություն կա իսկապես թուլացնելու սահմանափակումները»,- TT գործակալությունը մեջբերում է պետական համաճարակաբան Անդերս Թեգնելին։
Լիովին հանվել են արտադրական սահմանափակումները ինչպես փակ, այնպես էլ բացօթյա տարածքում։ Զանգվածային միջոցառումների մասնակիցներից նաեւ չեն պահանջի քովիդ-անձնագրեր։ Նրանք, ովքեր չեն պատվաստվել, պետք է նորից սոցիալական հեռավորություն պահպանեն եւ խուսափեն մարդկանց մեծ կուտակումներից։
Հանվում են նաեւ սահմանափակումները ռեստորաններում, չի պահանջվի հեռավորություն պահպանել սեղանների միջեւ, ինչպես նաեւ չի սահմանափակվի մարդկանց թիվը դրանց շուրջ։ Նորից կարելի կլինի պարել գիշերային ակումբներում։
Սեպտեմբերի 29-ից կչեղարկվի առողջապահության վարչության հանձնարարած՝ հեռահար աշխատանքի անհրաժեշտությունը, ինչը նշանակում է, որ շատ ծառայողներ կարող են աստիճանաբար վերադառնալ աշխատատեղեր։ Միեւնույն ժամանակ, COVID-19-ի նշաններ հայտնվելու դեպքում երկրի բնակիչներին խնդրում են մնալ տանը եւ թեստեր հանձնել։
Այսօրվա դրությամբ 7 141 873 մարդ կամ բնակչության 83,6 տոկոսը, 16 տարեկանից սկսած եւ ավելի բարձր, ստացել է COVID-19-ի դեմ պատվաստանյութի առնվազն մեկ դեղաչափ։ Նրանցից 6 536 355 մարդ կամ 76,5 տոկոսը լիովին իմունացված է։
