44-օրյա պատերազմի հետեւանքով տեղահանվածների աջակցության ծրագրից Ղարաբաղի ավելի քան 101 000 քաղաքացի է օգտվել: Այս մասին սեպտեմբերի 29-ին Ազգային ժողովում մարդու իրավունքների եւ հանրային հարցերի մշտական խորհրդարանական հանձնաժողովի կազմակերպած աշխատանքային հանդիպման ժամանակ հայտարարեց ՀՀ-ում Լեռնային Ղարաբաղի Հանրապետության մշտական ներկայացուցիչ Սերգեյ Ղազարյանը:
Ընդհանուր առմամբ, նրա խոսքով, տրամադրվել է մոտ 7 մլրդ 500 մլն դրամ:
«Ղարաբաղի կողմից չվերահսկվող համայնքներում գրանցված չափահաս եւ անչափահաս քաղաքացիներին 300 000 դրամի չափով օգնություն է տրամադրվել: Ծրագրերից օգտվել է 36 000 քաղաքացի: Ընդհանուր առմամբ տրամադրվել է մոտ 11 մլրդ դրամ: Ընդ որում, սեփականությունը կորցրած ղարաբաղցիներին տրամադրվել է միանվագ օգնություն՝ 250 000 դրամի չափով: Շահառուների թիվը 5400 է: Բացի այդ, Լեռնային Ղարաբաղի Հանրապետության քաղաքացիություն ունեցող մինչեւ 5 տարեկան երեխաներին տրամադրվել է միանվագ օգնություն` 20 000 դրամի չափով: Այս ծրագրից օգտվել է մոտ 14 700 երեխա: Ընդհանուր առմամբ, նրանց տրամադրվել է ավելի քան 290 մլն դրամ»,- հայտնեց Ղազարյանը: