Թուրքիան կարող է եւս երկու ատոմակայան կառուցել Թուրքիայում: Նման առաջարկով Թուրքիայի նախագահ Ռեջեփ Թայիփ Էրդողանը մեկ օր առաջ բանակցությունների ժամանակ դիմել է Ռուսաստանի նախագահ Վլադիմիր Պուտինին, գրում է Vesti.ru-ն:
«Պուտինը խոստացավ քննարկել այս հարցը,- ասել է Էրդողանն այսօր` մեկնաբանելով բանակցությունների արդյունքները:- Այդ դեպքում «Ակկույու» ԱԷԿ-ի հետ միասին կունենանք երեք ատոմակայան»:
Թուրք գործընկերոջ հետ բանակցությունների ընթացքում Ռուսաստանի Դաշնության նախագահը բարձրացրել է Թուրքիայում ռուսական մետաղագործության, նրբատախտակի եւ անվադողերի արտադրանքի ներմուծման լրացուցիչ տուրքերի հարցը, այսօր հայտնել է Ռուսաստանի նախագահի մամուլի քարտուղար Դմիտրի Պեսկովը: Ռուսաստանի Դաշնության եւ Թուրքիայի նախագահները քննարկել են նաեւ երկու երկրների միջեւ ռազմական ոլորտում համագործակցության շարունակությունը, այդ թվում` «Ս-400»-ների եւ այլ ուղղություններով համագործակցության ընդլայնման հնարավորությունը:
Թուրքիայի նախագահ Ռեջեփ Թայիփ Էրդողանը մեկ օր առաջ ասել էր, որ Ռուսաստանի կողմից Թուրքիայում կառուցվող «Ակկույու» ԱԷԿ-ի առաջին էներգաբլոկը կարող է բացվել հաջորդ տարի:
Շինարարությունն իրականացնում է «Ռոսատոմ» պետական կորպորացիան` 2010 թվականին կնքված պայմանագրի հիման վրա: Ատոմակայանը բաղկացած կլինի չորս էներգաբլոկներից `յուրաքանչյուրը 1200 ՄՎտ հզորությամբ ռեակտորներով: Ամբողջական հզորության հասնելուն պես ատոմակայանը տարեկան կարտադրի մոտ 35 միլիարդ կիլովատ ժամ եւ կբավարարի Թուրքիայի էլեկտրաէներգիայի կարիքների մինչեւ 10 տոկոսը:
