Կատարի եւ ԵՄ-ի բարձրաստիճան դիվանագետները Աֆղանստանում մարդու իրավունքների ոտնահարման վերջին դեպքերը «հիասթափեցնող» են անվանել, հայտնել է AFP-ն:
Անցյալ շաբաթ թալիբները Հերաթում հրապարակայնորեն կախաղան են հանել չորս ենթադրյալ առեւանգիչների, իսկ աղջիկները դեռեւս չեն կարողանում դպրոց հաճախել:
«Վերջին գործողությունները, որոնց ականատես ենք լինում Աֆղանստանում, շատ հիասթափեցնող են», - ասել է Կատարի արտաքին գործերի նախարար շեյխ Մոհամմեդ բին Աբդուլռահման Ալ-Թանին Դոհայում մամուլի ասուլիսի ժամանակ:
Անցյալ ամիս ամերիկյան զորքերի դուրսբերումից հետո Կատարը դարձել է առանցքային միջնորդ Աֆղանստանում՝ օգնելով տարհանել հազարավոր օտարերկրացիների եւ աֆղանստանցիների:
«Մենք պետք է շարունակենք համոզել նրանց (թալիբներին) չդիմել նման գործողությունների, եւ նաեւ փորձում ենք ցույց տալ թալիբներին, թե ինչպես մահմեդական երկրները կարող են ենթարկվել իրենց օրենքներին, ինչպես կարող են լուծել կանանց խնդիրները», - ասել է շեյխ Մոհամմեդը: «Նման օրինակ է Կատարը, որը մահմեդական երկիր է. մեր համակարգը իսլամական համակարգ է (սակայն) մեզ մոտ կան կանայք, ովքեր գերազանցում են տղամարդկանց կառավարությունում եւ բարձրագույն ուսումնական հաստատություններում»:
ԵՄ արտաքին քաղաքականության պատասխանատու Ժոսեպ Բորելը, որը ժամանել էր Դոհա հանդիման, պատասխանել է կատարցի բարձրաստիճան դիվանագետին՝ անվանելով «Աֆղանստանում տեղի ունեցող վերջին իրադարձությունները ... բավականին հիասթափեցնող»: «Հուսանք, որ մենք կկարողանանք վերակողմնորոշել ... Աֆղանստանի կառավարությունը», - ասել է նա՝ հավելելով, որ հույս ունի, որ Կատարը կարող է օգտագործել իր «ուժեղ ազդեցությունը» թալիբների վրա, որպեսզի դրդի խմբավորմանը բարելավել վերաբերմունքը խաղաղ բնակիչների նկատմամբ:
Շեյխ Մոհամմեդը թալիբներին կոչ է արել «աջակցել եւ պահպանել անցած տարիների ձեռքբերումները», սակայն նախազգուշացրել է միջազգային հանրությանը՝ չմեկուսացնել Աֆղանստանը:
«Մուսուլմանական երկրների համար շատ կարեւոր է լավ օրինակ ցույց տալ թալիբներին՝ կանանց իրավունքների չարաշահումից կամ շարիաթի օրենքների չարաշահումից խուսափելու համար», - ասել է շեյխ Մոհամմեդը:
