Կառավարության առաջարկած նախագծով առաջարկվում է սոցփաթեթից օգտվողների համար սպասարկման երկու լրացուցիչ ուղղություն: Խոսքը պետական կառույցների աշխատակիցների եւ նրանց ընտանիքների անդամների կողմից սպորտային-առողջարանական կենտրոնների, լողավազանների եւ նման այլ հաստատությունների ծառայություններից օգտվելու հնարավորության մասին է: Այս մասին հոկտեմբերի 1-ին Ազգային ժողովում Աշխատանքի եւ սոցիալական հարցերի մշտական հանձնաժողովի նիստին «Պետական եւ ծառայողական պաշտոններ զբաղեցնող անձնաց վճարների մասին» օրենքում փոփոխություններ եւ լրացումներ կատարելու մասին քննարկման ժամանակ ասաց աշխատանքի եւ սոցիալական հարցերի փոխնախարար Ռուբեն Սարգսյանը:
Բացի այդ, ինչպես նշեց Սարգսյանը, ուսանողական վարկերը հնարավոր կլինի մարել պետական սուբսիդիաների հաշվին:
«Այս փոփոխություններն ուղղված են աշխատակիցների եւ սոցփաթեթի շահառուների սոցիալական կարիքների բավարարմանը, ինչպես նաեւ նրանց մոտիվացիայի եւ աշխատանքի արդյունավետության բարձրացմանը: Այս նախագիծը փորձ է` բարձրացնելու աշխատանքի գրավչությունը պետական կառույցներում եւ կազմակերպություններում, ինչը թույլ կտա կրճատել կադրերի արտահոսքը պետական համակարգից դեպի մասնավոր»,- պարզաբանեց փոխնախարարը:
Բացի այդ, փոփոխությունների նախագիծը եւ կառավարության որոշումը ցույց են տալիս, որ քաղաքական պաշտոններ զբաղեցնող անձինք սոցփաթեթի շահառուներ չեն կարող դառնալ: Մասնավորապես, խոսքը հանրապետության վարչապետի, փոխվարչապետների, նախարարների, փոխնախարարների, Ազգային ժողովի պատգամավորների մասին է:
Սարգսյանը նաեւ ասաց, որ շահառուների թիվը տատանվում է 138.200-ից մինչեւ 147.500-ի միջեւ: Նա խնդրեց կառավարության նախաձեռնությանը դրական եզրակացություն տալ եւ այն խորհրդարանի նիստին քննարկել արագացված կարգով:
Հանձնաժողովը բավական երկարատեւ քննարկումներից հետո փոխնախարարի երկու խնդրանքներն էլ բավարարեց: