Լիտվան, որպես բարեկամական պետություն եւ «Արեւելյան գործընկերության» գործընկեր, կարող է կարեւոր դեր խաղալ Հայաստանի եւ Եվրամիության միջեւ համագործակցության խթանման հարցում։ Այս մասին Լիտվայի վարչապետ Ինգրիդա Շիմոնիտեի հետ հանդիպման արդյունքների վերաբերյալ հոկտեմբերի 4-ի ճեպազրույցում ասել է ՀՀ վարչապետ Նիկոլ Փաշինյանը։
Նրա խոսքով՝ Հայաստանը դինամիկ հարաբերություններ է հաստատել ԵՄ-ի հետ, եւ Լիտվան Երեւանի կարեւոր գործընկերներից է Եվրամիությունում։
«Դեմոկրատական արժեքները եւ ավանդական բարեկամական հարաբերությունները մեր ժողովուրդների միջեւ ստեղծել են ամուր հիմք երկկողմ համագործակցության համար։ Երկրների միջեւ գոյություն ունի չօգտագործված պոտենցիալ համագործակցության ընդլայնման համար տուրիզմի, կանաչ տեխնոլոգիաների, տեղեկատվական տեխնոլոգիաների, գյուղատնտեսության եւ սննդամթերքի վերամշակման ոլորտներում։ Շնորհակալ եմ Լիտվային Հայաստանին կորոնավիրուսի դեմ 50 հազար չափաբաժին պատվաստանյութ տրամադրելու համար»,- նշել է Փաշինյանը։
