Եվրախորհրդարանի պատգամավորները կոչ են արել հետաքննություն անցկացնել այն տեղեկությունների վերաբերյալ, ըստ որոնց Facebook-ը շահույթը հանրային շահերից վեր է դասում, հայտնել է Reuters-ը:
Տեղեկատու Ֆրենսիս Հաուգենը, ով աշխատել է որպես Facebook-ում արտադրանքի մենեջեր, ներքին փաստաթղթերով է կիսվել ԱՄՆ մի քանի նահանգների թերթերի եւ գլխավոր դատախազների հետ:
Եվրախորհրդարանի պատգամավորների հայտարարության մեջ ասվում է, որ իրենք պահանջում են այս բացահայտումների հետագա հետաքննություն: «Բացահայտումները, որոնք ներկայացրել է տեղեկատուն, ընդգծում են, թե որքան կարեւոր է այն, որ մենք թույլ չենք տալիս խոշոր տեխնոլոգիական ընկերություններին ղեկավարել մեզ», - ասել է դանիացի պատգամավոր Կրիստել Շալդեմոսեն:
«Փաստաթղթերում վերջապես ներկայացվել են բոլոր այն փաստերը, որոնք մեզ հնարավորություն կտան ավելի խիստ օրենք ընդունել թվային ծառայությունների վերաբերյալ», - հայտարարել է Եվրախորհրդարանի գերմանացի պատգամավոր Ալեքսանդրա Գիզը: «Մենք պետք է կարգավորենք ամբողջ համակարգը եւ բիզնես մոդելը, որը գերադասում է ապատեղեկատվությունն ու բռնությունը փաստերից եւ ապահովում է դրանց արագ տարածումը», - ասել է նա:
«Մեր դիրքորոշումը հստակ է՝ հանրային բանավեճերի եւ հանրային կյանքի վրա հիմնական հարթակների ազդեցությունը պետք է ենթարկվի ժողովրդավարությամբ հաստատված կանոններին, մասնավորապես` թափանցիկության եւ հաշվետվողականության կանոններին», - ասել է Եվրահանձնաժողովի ներկայացուցիչը` պատասխանելով Facebook-ի դեմ մեղադրանքների վերաբերյալ հարցին:
