Հոկտեմբերի 7-8-n Ուկրաինայի մայրաքաղաքում տեղի կունենա «Բացահայտիր Հայաստանը» ռոուդ շոուն` երկու երկրների զբոսաշրջության ոլորտի ներկայացուցիչների մասնակցությամբ, հաղորդում է AnalitikaUA.net-ը:
Կազմակերպիչների խոսքով` ռոուդ շոուի նպատակն է ցուցադրել Հայաստանի զբոսաշրջության բազմազան առաջարկները Կիեւի տուրօպերատորներին, տուրիստական գործակալներին եւ ԶԼՄ-ների ներկայացուցիչներին, երկրի դիրքավորումը` որպես նախընտրելի վայր ուկրաինական տուրօպերատորների եւ ճանապարհորդների շրջանում:
Միջոցառման ընթացքում հայ տուրօպերատորները հնարավորություն կունենան ծանոթանալու Ուկրաինայի զբոսաշրջության ներուժին եւ զբոսաշրջային արտադրանքներին:
ՀՀ էկոնոմիկայի նախարարության զբոսաշրջության կոմիտեի եւ Ուկրաինայի զբոսաշրջության զարգացման պետական գործակալության միջեւ կլոր սեղանի շրջանակներում կքննարկվեն զբոսաշրջության զարգացման համագործակցության հեռանկարները` երկու երկրների միջեւ առկա գործընկերության հետագա ամրապնդման եւ զբոսաշրջիկների ավելացման նպատակով:
Ըստ Ուկրաինայի հայերի միության ղեկավար Վիլեն Շատվորյանի` զբոսաշրջության ոլորտում համագործակցության զարգացումը Ուկրաինայի եւ Հայաստանի քաղաքացիների միջեւ հաճախակի շփումների հնարավորություն կստեղծի, ինչը, անշուշտ, կնպաստի երկու ժողովուրդների միջեւ բարեկամության ամրապնդմանը:
Երկու երկրների զբոսաշրջության պետական մարմինները Համատեղ գործողությունների պլան կստորագրեն, որը իրավական հիմք կստեղծի Հայաստանի եւ Ուկրաինայի միջեւ զբոսաշրջության ոլորտում համագործակցության հետագա զարգացման համար:
Մասնակիցները հնարավորություն կունենան տեղեկանալ Հայաստանի` որպես գինու զբոսաշրջության երկրի մասին եւ ճաշակել հայկական գինին:
B2B նստաշրջանը հարթակ կապահովի Հայաստանի եւ Ուկրաինայի տուրիստական գործակալությունների միջեւ փոխգործակցության համար` հետագա գործընկերության ապահովման եւ համագործակցության ընդլայնման նպատակով:
Պարբերականի տվյալներով` միջոցառումները կազմակերպել է ՀՀ էկոնոմիկայի նախարարության զբոսաշրջության կոմիտեն` Ուկրաինայի զբոսաշրջության զարգացման պետական գործակալության հետ համատեղ, Ուկրաինայի հայերի միության եւ Ուկրաինայում ՀՀ դեսպանության աջակցությամբ: