Իր մահճակալում քնած կինը միայն հրաշքով խուսափեց մահից, երբ նրա գլխից ընդամենը մի քանի սանտիմետր հեռավորությամբ, բարձի վրա երկնաքար ընկավ, տեղեկացնում է Gazeta-ն՝ հղում կատարելով Victoria News պարբերականին։
Երկնաքարը հոկտեմբերի 4-ին ծակեց Գոլդենում (Բրիտանական Կոլումբիա նահանգի հարավ-արեւելքում գտնվող քաղաք) ապրող կանադուհի Ռութ Համիլթոնի տան տանիքը։ Կինն արթնացավ աղմուկից եւ բարձին ինչ-որ պինդ բանի հարվածից։ Կինը չի տուժել, բայց թռչող օբյեկտը անցք է բացել նրա տան տանիքին, եւ ապահովագրական ընկերությունը դեռեւս որոշում է, թե կփոխհատուցի արդյոք նորոգումը։
«Ես պարզապես վեր թռա, միացրի լույսը, եւ չէի կարողանում հասկանալ, սատանան տանի, թե ինչ է տեղի ունեցել,- պատմում է Համիլթոնը։- Միակ բանը, որ մտածում էի, այն էր, որ կյանքն անգին է, եւ այն կարող է ընդհատվել ցանկացած պահի, անգամ եթե մտածում ես, թե անվտանգ քնած ես մահճակալիդ մեջ»։ Նա այժմ ծրագրում է ի հիշատակ պահել երկնաքարի մի կտոր թոռների համար։ Համիլթոնն ասում է, որ հազիվ թե կզբաղվի աստղեր դիտելով կամ կտարվի աստղագիտությամբ՝ որպես հոբբի։ «Կարծում եմ՝ սա ինձ հերիք է ամբողջ կյանքիս համար»,- ասել է նա։
Համիլթոնը ոստիկանություն է կանչել, որը որոշել է, որ երկնաքարը ինտենսիվ մետեորային հոսքի մի մասն է, որը նախօրեի գիշերը նկատվել է Լուիզ լճի վրա, նրա տնից 80 կիլոմետր արեւելք։