Messenger WhatsApp-ն աշխատում է հավելվածի ներսում խմբերի համար նոր գործառույթի ստեղծման ուղղությամբ, հաղորդում է XDA Developers-ը:
WhatsApp-ի բետա-տարբերակում լրագրողները հայտնաբերել են կոդի մի քանի նոր տողեր, որոնք մատնանշում են «Համայնքներ» կոչվող գործառույթի ներդրման աշխատանքները:
Բետա-տարբերակում առկա տեղեկատվության հիման վրա «Համայնքներ» գործառույթը մեծապես կհամընկնի «Խմբեր» գոյություն ունեցող գործառույթի հետ: Լրագրողները վստահ են, որ խոսքը «Խմբեր» գործառույթը վերանվանելու մասին չէ, քանի որ երկուսն էլ առկա են բետա-տարբերակում եւ նկարագրության մեջ նշվում են միասին:
Նրանց կարծիքով, «Համայնքներ» գործառույթը WhatsApp մեսենջերի ներսում սեփական սոցիալական ցանցերի ստեղծումն է: Գործառույթը նշանակությամբ մոտ կլինի նրան, թե ինչպես են խմբերն աշխատում Facebook սոցիալական ցանցում: Համայնքը կկարողանա պարունակել մի քանի խմբեր, ինչպես նաեւ ադմինիստրատորների հաղորդագրությունների ալիք լինել: