Լիբանանի հրշեջները մարել են հսկայական հրդեհը, որը բռնկվել է վառելիքի հիմնական պահեստում։
Հրդեհը բռնկվել է առավոտյան ժամը 8:00-ի սահմաններում, Բեյրութից 50 կիլոմետր հարավ՝ Զահրանիի օբյեկտներում գտնվող մեծ բենզինի բաքում, որը պատկանում է բանակին, հաղորդում է Ազգային լրատվական գործակալությունը:
AFP-ն հայտնում է, որ հրշեջները կեսօրին մոտ կրակը մարել են, իսկ քաղաքացիական պաշտպանության ղեկավար Ռեյմոնդ Խաթարը մամուլին ասել է, որ հրդեհը «վերահսկողության տակ է»:
Զահրանիի արտադրական համալիրի ղեկավար Զիյադ ալ-Զեյնը հայտնել է, որ հրդեհը բռնկվել է ցիստեռնը դատարկելիս:
Էներգետիկայի նախարար Վալիդ Ֆայադը հայտարարել է, որ հրդեհի հետեւանքով այրվել է մոտ 250 հազար լիտր բենզին եւ հրդեհի պատճառների հետաքննություն է սկսվել:
Բանակը շրջափակել է տարածքը՝ կտրելով պահեստ տանող ճանապարհները, ինչպես նաեւ Բեյրութը երկրի հարավին կապող գլխավոր մայրուղին:
