Չինաստանը հաղթել է արհեստական բանականության համար ԱՄՆ-ի հետ մղվող պայքարում եւ իր տեխնոլոգիական առաջընթացների շնորհիվ շարժվում է դեպի համաշխարհային տիրապետություն: Այս մասին Financial Times-ին հայտնել է Պենտագոնի ծրագրակազմի գծով առաջին տնօրեն Նիկոլաս Չիլանը, ով հրաժարական է տվել՝ ի նշան բողոքի ԱՄՆ բանակում տեխնոլոգիական փոփոխությունների դանդաղ տեմպերի դեմ: Նա նշել է, որ արձագանքի բացակայությունը ԱՄՆ-ին սպառնալիքի տակ է դնում:
Ըստ արեւմտյան հետախուզության գնահատականի՝ մոտ մեկ տասնամյակ Չինաստանը, ամենայն հավանականությամբ, կգերիշխի զարգացող շատ կարեւոր տեխնոլոգիաներում, հատկապես արհեստական բանականության, սինթետիկ կենսաբանության եւ գենետիկայի ոլորտում:
«Մենք 15-20 տարի հետո Չինաստանի դեմ պայքարելու մրցակցային հնարավորություն չունենք»,- ասել է Չիլանը:
Նա նշել է, որ Չինաստանը վճռական է գերիշխելու աշխարհի ապագային՝ վերահսկելով ամեն ինչ՝ ԶԼՄ-ների չափորոշիչներից մինչեւ աշխարհաքաղաքականություն:
Չիլանը ամերիկյան ընկերություններին, այդ թվում՝ Google-ին, մեղադրել է արհեստական բանականության հարցերում կառավարության հետ համագործակցել չցանկանալու մեջ:
Չինական ընկերությունները, ըստ Չիլանի, ստիպված են եղել համագործակցել իրենց կառավարության հետ եւ «զանգվածային ներդրումներ» կատարել արհեստական բանականության մեջ՝ առանց էթիկային ուշադրություն դարձնելու: Նա նշել է, որ ԱՄՆ-ի կիբեռպաշտպանությունը որոշ պետական գերատեսչություններում «գտնվում է մանկապարտեզի մակարդակի վրա»:
