Թաիլանդը նախատեսում է նոյեմբերի 1-ից ամբողջությամբ բացել երկիրը ցածր ռիսկային համարվող երկրներից ժամանող պատվաստված զբոսաշրջիկների համար, հաղորդել է AP-ն:
Մինչեւ համավարակը Թաիլանդը տարեկան մոտ 40 միլիոն զբոսաշրջիկ էր գրավում իր տեսարժան լողափերով եւ աշխույժ գիշերային կյանքով, ընդ որում, զբոսաշրջությունը կազմում էր երկրի ազգային եկամտի գրեթե 20 տոկոսը: Սակայն կորոնավիրուսի հետ կապված ճանապարհորդական սահմանափակումները վնաս են հասցրել տնտեսությանը՝ հանգեցնելով վատթարագույն ցուցանիշներին վերջին ավելի քան 20 տարվա ընթացքում:
Վարչապետ Պրայուտ Չան-Օ-Չան հայտարարել է, որ երկիրը կբացի իր սահմանները «ցածր ռիսկային համարվող երկրներից» ժամանող պատվաստված զբոսաշրջիկների համար:
Ցածր ռիսկային համարվող 10 երկրների թվում են Մեծ Բրիտանիան, ԱՄՆ-ը, Չինաստանը, Գերմանիան եւ Սինգապուրը:
«Ժամանումից հետո նրանք պետք է ներկայացնեն (բացասական) քովիդի թեստի պատասխան ... եւ ժամանելուն պես մեկ այլ թեստ հանձնեն», - ասել է վարչապետը հեռուստատեսային ուղերձում: Թեստի բացասական արդյունքը ստանալուց հետո «նրանք կարող են ազատ ճանապարհորդել, ինչպես Թաիլանդի բնակիչները», - ասել է նա:
Նրա հայտարարությունը զգալիորեն մեղմացնում է պատվաստված զբոսաշրջիկների նկատմամբ ներկայիս սահմանափակումները, ովքեր առնվազն յոթօրյա հյուրանոցային կարանտին պետք է անցնեն: