Մեր ռուս գործընկերների մոտ կա հստակ ընկալում իրավիճակի, այն պատկերացումները, գնահատականները, որոնք մենք ունենք, գրեթե ամբողջությամբ կիսում են մեր ռուս գործընկերները: Այս մասին, այսօր՝ հոկտեմբերի 12-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը:
Հարցին, թե ՌԴ-ում իր հանդիպումների արդյունքներով հնարավոր եղե՞լ է հասնել նրան, որ ռազմագերիներն ազատ արձակվեն եւ ինչ ժամկետներում դա կարող է տեղի ունենա, նա պատասխանեց. «Ռազմագերիները պետք է վաղուց վերադարձած լինեին ամբողջությամբ: Ադրբեջանը փաստացի չի կատարում իր պարտավորությունները տարբեր շինծու արդարացումներ բերելով:
Երբ խոսում ենք ճանապարհներ բացելու մասին, նախեւառաջ այդ ճանապարհներով պետք է մեր ռազմագերիները վերադառնան:
Կարող եմ ասել, որ այդ հանդիպումներում նաեւ կոնկրետ անձանց հետ կապված քննարկումներ են տեղի ունեցել եւ ես խնդրել եմ միջամտել: Կարմիր Խաչը նշել է, որ կին ռազմագերու հետ կապված տեղեկատվություն կա: Ցավոք սրտի, ադրբեջանակական կողմը չի հաստատում այդ տեղեկությունը: Ես մեծ հույսեր ունեմ, որ մոտ ապագայում մենք ռազմագերի արտահայտությունը թողնենք անցյալում: Դա մեր առաջնային խնդիրներից մեկն է»: