Քուվեյթի իշխանությունները կանանց թույլ կտան մարտական առաջադրանքներ կատարել բանակում՝ երկար տարիներ քաղաքացիական դերով սահմանափակվելուց հետո:
Պաշտպանության նախարար Համադ Ջաբեր Ալ Ալի Ալ Սաբահն ասել է, որ կանայք կկարողանան տարբեր ռազմական կոչումներ ստանալ, այդ թվում` սպայի: «Եկել է ժամանակը, որ քուվեյթցի կանայք կարողանան իրենց եղբայրների հետ Քուվեյթի բանակ մտնել»,- ասել է նախարարը՝ KUNA պետական լրատվական գործակալությանը:
Նա վստահություն է հայտնել «կանանց հնարավորությունների եւ դժվարություններին դիմանալու ունակության» մասին:
Քուվեյթցի կանայք քվեարկության իրավունք են ստացել 2005 թվականին եւ ակտիվորեն աշխատել են ինչպես կառավարությունում, այնպես էլ խորհրդարանում, չնայած տեղեր չեն ստացել ներկայիս խորհրդարանում: