Աստղագետների միջազգային խումբը հայտնաբերել է «անսովոր ազդանշաններ», որոնք գալիս են Ծիր Կաթինի սրտից, եւ կասկած կա, որ դրանց աղբյուրը «աստղային օբյեկտների նոր դասը» կարող է լինել, հայտնում է CNBC-ը:
Տիեզերքի օբյեկտները, ինչպիսիք են մոլորակները, գիսաստղերը, գազի հսկա ամպերը եւ աստղերը, ունեն փոփոխվող մագնիսական դաշտեր եւ արտադրում են ռադիոալիքներ, որոնց կարելի է Երկրի վրա տարածված ռադիոաստղադիտակների մեծ զանգվածների միջոցով որսալ:
Սակայն նոր ուսումնասիրության մեջ, որը հրապարակվել է Astrophysical Journal-ում, մանրամասն նկարագրվում է ռադիոալիքների հայտնաբերման մասին, որոնք նման չեն այն ամենին, ինչ նախկինում գիտնականները հանդիպել են:
«Սկզբում մենք մտածում էինք, որ դա կարող է պուլսար լինել` պտտվող մահացած աստղի շատ խիտ տեսակ, կամ աստղի այնպիսի տեսակ, որը արեւի հսկայական բռնկումներ է ճառագայթում: Բայց այս նոր աղբյուրի ազդանշանները չեն համապատասխանում նրան, ինչ մենք ակնկալում ենք այս տիպի երկնային օբյեկտներից»,- ասում է հետազոտության գլխավոր հեղինակ Ցզիտենգ Վանը:
«Այս նոր ազդանշանի ամենատարօրինակ հատկությունն այն է, որ այն ունի շատ բարձր բեւեռացում: Սա նշանակում է, որ նրա լույսը տատանվում է միայն մեկ ուղղությամբ, բայց այդ ուղղությունը պտտվում է ժամանակի ընթացքում»,- ասել է Վանը:
«Օբյեկտի պայծառությունը նույնպես կտրուկ փոխվում է՝ 100 անգամ, եւ ազդանշանը միանում ու անջատվում է, ըստ երեւույթին, պատահականորեն: Մենք երբեք նման բան չենք տեսել»,- հավելել է նա:
Օբյեկտից ստացված ազդանշանները, որոնք կոորդինատների պատճառով ստացել են ASKAP J173608.2-321635 անվանումը, անցյալ տարվա ինն ամիսների ընթացքում գրանցվել են վեց անգամ: Գիտնականներն ասել են, որ փորձել են օբյեկտը գտնել տեսողական լույսի ներքո, սակայն չի հաջողվել:
Աստղագետներն ասում են, որ նախատեսում են շարունակել օբյեկտի դիտարկումը, որպեսզի հասկանան, թե դա ինչ կարող է լինել, եւ հույս ունեն, որ կատարելագործված աստղադիտակները, որոնք կհայտնվեն առաջիկա տարիներին, կօգնեն լուծել այս առեղծվածը: