Եվրասիական տնտեսական բարձրագույն խորհրդի նիստին ՀՀ վարչապետ Նիկոլ Փաշինյանը հայտարարել է Եվրասիական տնտեսական միության (ԵԱՏՄ) շրջանակներում էկոլոգիապես մաքուր տրանսպորտի զարգացման կարեւորության մասին:
Վարչապետի խոսքով՝ ներկայիս փուլում համաշխարհային հանրության առջեւ ծառացած խնդիրներից մեկը կապված է կլիմայի փոփոխության հետ. «Դրանք ազդում են ոչ միայն տնտեսության, այլեւ սոցիալական գործընթացների վրա: Այս առումով ԵԱՏՄ անդամ երկրների փոխազդեցություն է անհրաժեշտ` կլիմայի փոփոխության հետեւանքների մեղմմանն ուղղված միջոցառումների մշակման համար»:
Փաշինյանը կարծիք է հայտնել, որ անհրաժեշտ է ադապտացվել վնասակար նյութերի արտանետումների ցածր մակարդակ ունեցող տնտեսությունների զարգացմանը:
Այս տեսանկյունից Փաշինյանը կարեւորել է ԵԱՏՄ-ում էկոլոգիապես մաքուր տրանսպորտի խթանմանն ուղղված աշխատանքը. «ԵԱՏՄ-ում էլեկտրամոբիլների շուկայի ձեւավորման համար պայմանների ստեղծումը բխում է տնտեսական անվտանգության եւ հանրային առողջության շահերից: Սա նաեւ կնպաստի նոր տեխնոլոգիաների ավելի լայն ներդրմանը եւ ազգային տնտեսությունների արդիականացմանը՝ բարձրացնելով գիտատար ոլորտների ներգրավվածության մակարդակը»:
Փաշինյանը խնդրել է Եվրասիական տնտեսական հանձնաժողովին, ազգային իշխանությունների հետ համատեղ, ուժեղացնել աշխատանքն այս ուղղությամբ, ավելի ակտիվորեն ներգրավել դրանում գործարար համայնքին եւ գիտական շրջանակները: