ԱՊՀ պետությունների ղեկավարների խորհրդի հաջորդ նիստը տեղի կունենա 2022 թվականի հոկտեմբերի 14-ին Ղազախստանի մայրաքաղաքում: Այս մասին լրագրողներին հայտարարեց Գործադիր կոմիտեի նախագահ-ԱՊՀ գործադիր քարտուղար Սերգեյ Լեբեդեւն ԱՊՀ պետությունների ղեկավարների խորհրդի նիստից հետո:
«ԱՊՀ պետությունների ղեկավարների խորհրդի հաջորդ նիստը տեղի կունենա հաջորդ տարվա հոկտեմբերի 14-ին Նուր-Սուլթանում»,- ասել է Լեբեդեւը, փոխանցում է ՏԱՍՍ-ը:
Ընդ որում, նա չի բացառել, որ Նուր-Սուլթանում գագաթնաժողովից առաջ կարող են ԱՊՀ երկրների ղեկավարների ոչ պաշտոնական հանդիպումներ տեղի ունենալ: «Այսօր դրան խոչընդոտում է համավարակը, բայց մենք բոլորս հույս ունենք, որ ի վերջո մենք կկարողանանք հաղթահարել այս հիվանդությունը եւ նորից վերադառնալ այն իրավիճակին, որտեղ կարող ենք դեմ առ դեմ հանդիպել: Եթե նման հնարավորություն ընձեռվի, ապա ես խորապես համոզված եմ, որ դրան կհաջորդեն ԱՊՀ պետությունների ղեկավարների ոչ պաշտոնական հանդիպումները»,- ասել է ԱՊՀ գործադիր կոմիտեի նախագահը:
Լեբեդեւը հայտարարել է, որ ուրբաթ պետությունների ղեկավարների խորհրդի նիստը հաջող է անցել, եւ արդյունքում առաջարկությունների իրականացման պլան կնախապատրաստվի: «Մեծ գոհունակությամբ կարող եմ ասել, որ այն հաջող է անցել: Ելույթներն անկեղծ էին՝ իրենց ուշադրությունը կենտրոնացնելով առկա խնդիրների վրա, եւ որ ամենակարեւորն է՝ մեր փոխգործակցության հեռանկարների վրա: Հնչեցին բազմաթիվ գաղափարներ ու առաջարկություններ: Մենք ուշադիր կուսումնասիրենք, կվերլուծենք այդ բոլոր առաջարկները, դրանց իրականացման համապատասխան պլան կնախապատրաստենք»,- ասել է նա:
