Իհարկե, թիմում քննարկումներ ունեցել ենք եւ դեռ կունենանք. Դրանք մեկանգամյա պրոցես չեն. Ընտրություններ են տեղի ունեցել, պետք է վերլուծել, հասկանալ՝ որտեղ ինչ խնդիրներ կան: Այս մասին, այսօր՝ հոկտեմբերի 19-ին, լրագրողների հետ զրույցում նշեց ՏԿԵ նախարար Գնել Սանոսյանը:
«Ընդհանրապես, նորմալ ենք վերաբերվում, քաղաքական պրոցես է, որպես իշխանություն շատ կարեւոր ենք համարում ընտրություններն արդար, թափանցիկ, ազատ կազմակերպելը եւ կարծում եմ՝ դա մեզ հաջողվել է: նաեւ կարծում եմ՝ նաեւ դրա արդյունքում է, որ մի շարք քաղաքական ուժեր հնարավորություն ունեն ներկայանալու տարբեր բնակավայրերի ավագանիների կազմում»,-ասաց նա:
Խոսելով ԱԺ արտահերթ ընտրություններում եւ ՏԻՄ ընտրություններում արդյունքների տարբերությունների մասին, Սանոսյանն ասաց. «Ավանդաբար մեզ մոտ համապետական ընտրությունները եւ ՏԻՄ ընտրությունները բնույթով տարբերվում են: Յուրաքանչյուր քաղաքական ուժ պետք է հետեւություններ անի, այդ թվում նաեւ մենք եւ շարժվենք առաջ: Նոյեմբերին ունենք ընտրություններ, դեկտեմբերին ունենք: Բայց այս ամբողջ համատեքստում որպես ՏԿԵ նախարար, կարեւորում եմ հետեւյալը, որ մենք կառավարության ծրագիրն ընդունել ենք, որի կետերը պետք է իրագործենք մեր համայքների, համայնքապետերի հետ միասին»:
Անդրադառնալով Գյումրիում ՔՊ-ի պարտությանը, նախարարն ասաց, որ դա ավելի շատ կապում է ցածր մասնակցության հետ. «Դա սպասելի չէր, զարմանալի էր նման ցածր թվով մասնակցությունը: Ընտրությունների նման ելքը կապում եմ դրա հետ:
Իշխանական թիմն իր առջեւ խնդիր չի դրել 100 տոկոսով բոլոր ընտրություններում հաղթելու»:
