Հայաստանի ոստիկանությունը տեղեկություններ չունի, որ Սյունիքի մարզի Գորիս-Կապան ավտոճանապարհին ադրբեջանցի իրավապահները Հայաստանի քաղաքացու են տուգանել: Այս մասին հոկտեմբերի 19-ին ՀՀ ԱԺ-ում Պաշտպանության եւ անվտանգության հարցերի մշտական հանձնաժողովի նիստին, պատասխանելով ընդդիմադիր «Հայաստան» դաշինքի պատգամավոր Գեղամ Մանուկյանի հարցին, ասաց ՀՀ փոխոստիկանապետ Արա Ֆիդանյանը:
Փոխոստիկանապետի խոսքով՝ եթե նման դեպք իսկապես եղել է, ապա պետք է անհապաղ տեղեկացնել համապատասխան ծառայություններին: «Եվ նաեւ մեզ տեղյակ պահել, քանի որ այդ մասին առաջին անգամ ենք լսում»,- ընդգծեց Ֆիդանյանը:
Ի պատասխան` Մանուկյանն ասաց, որ Ադրբեջանի ուժայինների կողմից տուգանված քաղաքացին կապ է հաստատել ընդդիմության հետ:
«Ես անպայման ձեզ կտամ նրա կոնտակտային տվյալները»,- ասաց Մանուկյանը:
NEWS.am-ը նախօրեին գրել էր նման միջադեպի մասին: Արդեն հայտնի է հայ փոխադրողներից ապրանքների շորթման դեպքերի մասին: Բայց ՀՀ ոստիկանությունում, ըստ երեւույթին, մամուլ չեն կարդում:
