Բրիտանիայում երիտասարդին ցմահ բանտարկություն է սպառնում ըստ «սատանայական պակտի» երկու քույրերի սպանության համար, տեղեկացնում է AP-ը։
19-ամյա Դանյալ Հուսեյնը անցած տարվա հունիսին գազանաբար մորթել է 46-ամյա Բիբա Հենրիին եւ 27-ամյա Նիքոլ Սմոլմանին Ուեմբլի այգում։ Նա «վրեժի ակցիան» սկսել է պատահական կանանց դեմ Mega Millions Super Jackpot վիճակախաղով 321 մլն ֆունտ ստեռլինգ շահելու անհաջող փորձից հետո։
Ոստիկանությունը գտավ նրան ԴՆԹ-ի օգնությամբ եւ հայտնաբերեց ձեռքով գրված խոստում «Թագավոր Լյուցիֆուգ Ռոֆոկալե» սատանային՝ սպանելու վեց կին յուրաքանչյուր վեց ամսում, որը ստորագրված էր արյամբ։
Հուսեյնը հրաժարվել է ցուցմունք տալ դատարանում եւ մեղավոր է ճանաչվել երկու մեղադրանքով՝ սպանություն եւ դանակի պահում։
Սպանության պատրաստվելով՝ Հուսեյնը դանակը գնել էր Asda-ից եւ գլխի սեւ փաթթոց Amazon-ից, գրանցվել վիճակախաղերի գրավադրման կայքում։ Հուսեյնը Հենրիին հարվածել է ութ անգամ, Սմոլմանին՝ 28։ Հետո նա նրանց քարշ է տվել թփերի մեջ, որտեղ աննկատ մնացել են 36 ժամ։
Հաջորդ 10 օրում Հուսեյնը ծախսել է 162,88 ֆունտ ստեռլինգ վիճակախաղի տոմսերի եւ գրավադրման վրա, բոլորն՝ անհաջող։
Նրա ննջարանի խուզարկության ժամանակ (տունը գտնվում է Լոնդոնի հարավ-արեւելքում) հայտնաբերվել են հմայությունների գիրք, սատանաների ձեռագիր խորհրդանշաններ եւ երկու արյունոտ պակտ։ Ատենակալներին չեն տեղեկացրել չարքերի կողմից Հուսեյնի տարվածության, հմայությունների մասին։
Սպանություններից առաջ Հուսեյնը ծանոթներին պատմում էր չարքերի եւ կախարդական դարմանների մասին, ինչպես նաեւ սկանդինավյան առասպելաբանության օնլայն-հետազոտություններ էր անցկացնում։
Կարծիք կա, որ նրա վրա ազդել է ամերիկացի սեւ մոգի աշխատանքը, որը կապեր ունի Մեծ Բրիտանիայում տեղակայված, «Ինն անկյան օրդեն» անունը կրող նացիստական սատանայական խմբի հետ։
