Ես վստահ եմ, որ 2018-ին ՀՀ-ում հեղափոխություն չի եղել, եղել է կոնկրետ մարդկանց պաշտոնների տեղադրում, որպեսզի տեղի ունենա այն, ինչ պետք է տեղի ունենար որոշակի արտաքին ուժերի միջամտությամբ: Այս մասին այսօր՝ հոկտեմբերի 29-ին, «Կորսված հաղթանակ. Դավաճանություն թե անգրագիտություն» թեմայով համաժողովի ժամանակ հայտարարեց հեռուստալրագրող Նաիրի հոխիկյանը:
Նրա համոզմամբ, Նիկոլ Փաշինյանին 2000-ականների սկզբից հետեւողականորեն աճեցրին, սարքեցին մարդ, ով պետք է հանձներ. «Նրա կողքին կանգնածների 99 տոկոսը մարդիկ են, որոնք տարիներ շարունակ դաստիարակվել են դրամաշնորհներով, կոնկրետ աշխատանքներ են տարվել նրանց վրա
Նրանք կոնկրետ բուհերում, կոնկրետ երկրների հատուկ ծառայությունների կողմից դասընթացներ են անցել:
Այն քայլարշավը կոչվում էր Ստամբուլյան մարշ, որի առաջին փորձը տեղի ունեցավ 2017-ին հուլիսին Ստամբուլում: Դա շատ լավ մշակվել էր Մեծ Բրիտանիայի կողմից: Թուրքիայի քեմալիստական կուսակցության նախագահ Քեմալ Քըլըչդարօղլուն Անկարային քայլելով հասավ Ստամբուլ եւ նրա հետեւից մոտ մեկ մլն մարդ քայլեց»,-ասաց նա:
Հոխիկյանի ներկայացմամբ, Նիկոլ Փաշինյանին բերել էին իշխանության եւ նա շատ լավ գիտեր, որ պետք է աստիճանաբար հանձնի. «2018-2019-ին տարվում էր աշխատանք, որ թշնամու կերպարը պետք է ջարդել, բայց քանի որ եւ զինվորական ղեկավարությունը, եւ Արցախի ղեկավարությունը գրողի ծոցն ուղարկեցին այդ դավաճանական ծրագրերը, իմ կարծիքով որոշում կայացվեց, որ չեք ուզում լավ ձեւով, կլինի վատ ձեւով: Դրա համար էլ 2020-ի մարտից մինչեւ հուլիս, Արցախի հարավում փորձառու, լավ հրամանատարներին սկսեցին աստիճանաբար հետ քաշել եւ նրանց փոխարեն հարավային շրջաններում բարձր պաշտոնների նշանակել մարդկանց, որոնք աչքի էին ընկել վատ հատկանիշներով: Սրանից կարելի է գալ եզրակացության, որ 2019-ի վերջից արդեն կար պայմանավորվածություն պատերազմով հանձնելու»:
