Իրանը եւ համաշխարհային տերությունները, որոնք ձգտում են վերականգնել 2015թ. միջուկային գործարքը, փորձում են համաձայնեցնել Վիեննայում բանակցությունների վերսկսման օրը որքան հնարավոր է շուտ։ Այս մասին հայտարարել է ԵՄ պաշտոնական ներկայացուցիչ Պիտեր Ստանոն, տեղեկացնում է Reuters-ը։
Իրանի գլխավոր բանակցողը Բրյուսելում այս շաբաթվա բանակցություններից հետո հայտարարել է, որ բանակցությունները Վիեննայում կվերսկսվեն նոյեմբերի վերջին։
Ստանոն ասել է, որ հոկտեմբերի 27-ի հանդիպումը Բրյուսելում «օգտակար» էր եւ «օգնել է որոշել հետագա ուղին Վիեննայում բանակցությունների վերսկսման համար»։ «Մենք աշխատում ենք միասին այլ գործընկերների հետ, այդ թվում՝ Իրանի եւ այլ կողմերի, որոնք ստորագրել են (միջուկային գործարքն Իրանի հետ), որպեսզի որքան հնարավոր է շուտ նշվի կոնկրետ օր Վիեննայում հանդիպման համար»,- ասել է Ստանոն ավանդական ճեպազրույցում։
Ապրիլին Թեհրանը եւ վեց տերություններն սկսել են քննարկել 2015թ. միջուկային պակտի փրկության միջոցները, որից ԱՄՆ-ը դուրս եկավ երեք տարի առաջ։ Բայց բանակցությունները դադարեցվեցին հունիսին Իրանի նախագահ Իբրահիմ Ռայիսիի ընտրությունից հետո։