Նովոսիբիրսկի գիտնականներն արհեստական ինտելեկտի (AI) միջոցով դիաբետով հիվանդների մոտ հիպոգլիկեմիայի կանխատեսման նոր մեթոդ են մշակել: Արդյունքները կօգնեն սմարթֆոնի կամ այլ գաջեթի համար նախատեսված հավելված ստեղծել, որը կարող է նախազգուշացնել հիվանդներին կյանքին սպառնացող վիճակի զարգացման մասին։ Այս մասին հայտնում է «Լենտա Ռու»-ն։
Հիպոգլիկեմիա են անվանում արյան գլյուկոզի չափազանց ցածր մակարդակը, որը կարող է օրգանների անբավարարության, կոմայի եւ նույնիսկ մահվան հանգեցնել: Շաքարային դիաբետ չունեցող մարդկանց մոտ, երբ գլյուկոզի պակաս կա, ինսուլինի արտադրությունը, որը ուտիլիզացնում է գլյուկոզան, դադարում է, իսկ լյարդը սկսում է շաքար արտազատել արյան մեջ: Այս մեխանիզմը կանխում է հիպերգլիկեմիայի զարգացումը։ Սակայն ինսուլինակախված շաքարախտով հիվանդների մոտ այս մեխանիզմը չի գործում՝ լյարդը չափազանց դանդաղ է գլյուկոզա արտադրում, իսկ ինսուլինի ավելցուկը հնարավոր չէ շատ ուժեղ հեռացնել արյան միջից:
Հիպոգլիկեմիայից կարելի է խուսափել վաղ փուլում՝ քաղցր մթերքներ օգտագործելով, բայց դա հաճախ տեղի է ունենում քնած ժամանակ: Այս խնդիրը լուծելու համար գիտնականները վերլուծել են հիվանդների տվյալները, որոնք հավաքագրվել են կրելի սարքերի միջոցով: Արյան մակարդակը չափվում էր յուրաքանչյուր հինգ րոպեն մեկ, այնուհետեւ ստեղծվում էին գլյուկոզի մակարդակի անկումը կանխատեսող մոդելներ՝ վիճակի սկսվելուց հինգ րոպե կամ կես ժամ առաջ: Այդ ժամանակը բավարար է, որպեսզի հիվանդը միջոցներ ձեռնարկի հիպոգլիկեմիայի կանխարգելման համար:
