Հայաստանում մարդիկ սկսել են ավելի հաճախ անկանխիկ վճարումներ կատարել` իրենց առօրյա մանրածախ առեւտրային գործարքներն իրականացնելու համար։ Այս մասին նոյեմբերի 9-ին Ազգային ժողովում ԱԺ ֆինանսավարկային եւ բյուջետային հարցերի մշտական հանձնաժողովի նիստին «Անկանխիկ վճարումների մասին» օրինագծերի եւ հարակից օրենքներում փոփոխություններ կատարելու մասին փաթեթի քննարկմանը հայտարարեց Կենտրոնական բանկի նախագահի տեղակալ Վախթանգ Աբրահամյանը:
Կենտրոնական բանկի ներկայացուցիչը, մասնավորապես, ներկայացրել է անկանխիկ վճարումների վիճակագրությունը՝ 2018 թվականից սկսած. «Մենք ունենք բանկային համակարգի միջոցով թողարկված շուրջ 2.6 մլն քարտ, մոտ 1600 բանկոմատ, ավելի քան 1600 POS տերմինալ եւ մոտ 3000 վիրտուալ POS տերմինալ»,- ասաց Աբրահամյանը։
Խոսելով քարտային գործարքների դրույքաչափերի մասին՝ ԿԲ նախագահի տեղակալը նշեց, որ 2018 թվականին արտասահմանյան քարտերով կատարվել է շուրջ 3 մլն գործարք, արտերկրում՝ հայկական քարտերով՝ մոտ 2 մլն, իսկ Հայաստանում հայկական քարտերով՝ մոտ 33 մլն գործարք։
«2021 թվականի առաջին կիսամյակում մենք արդեն շուրջ 33 միլիոն գործարք ենք կնքել։ Այսինքն՝ գործարքների թիվը գրեթե կրկնապատկվել է»,- ասաց Աբրահամյանը։
Ավելին, նա 2020 թվականը համարում է բեկումնային տարի, հատկապես` այն առումով, որ կորոնավիրուսի համավարակի պատճառով շատերն են անցել առցանց գործարքների։ «2021 թվականի առաջին կիսամյակում առցանց հարթակում իրականացվել է շուրջ 300 մլրդ դրամի գործարք։ Եվ սա միայն քարտերի մասով: Խոսքը 2021 թվականի առաջին կիսամյակում շուրջ 365 մլրդ դրամի անկանխիկ գործարքների մասին է եւ բանկոմատների միջոցով շուրջ 900 մլրդ դրամի կանխիկ գործարքների մասին։ Գործարքների մոտ 65 տոկոսը քանակական առումով անկանխիկ է։ 2021 թվականի առաջին եռամսյակում անկանխիկ գործարքները կազմել են 70 տոկոս: Անկանխիկ գործարքի միջին արժեքը 2017 թվականի 27000 դրամից արդեն հասել է մոտ 9600 դրամի։ Սա վկայում է այն մասին, որ իր առօրյա գործունեության մեջ` մանրածախ առեւտրի մեջ մարդիկ սկսել են ավելի հաճախ օգտվել անկանխիկ վճարումներից»,- պարզաբանեց ԿԲ նախագահի տեղակալը։