2021 թվականին Հայաստանն արդեն ԵԱՏՄ երկրների հետ առեւտրի եւ համագործակցության կայուն աճի տեմպեր է արձանագրել։ Այս մասին նոյեմբերի 19-ին Եվրասիական միջկառավարական խորհրդի լայն ձեւաչափով նիստին հայտարարեց ՀՀ վարչապետ Նիկոլ Փաշինյանը։
Թվերը, նրա խոսքով, դրա վառ ապացույցն են. Հայաստանի եւ ԵԱՏՄ երկրների միջեւ արտաքին առեւտրաշրջանառությունը 2021 թվականի հունվար-սեպտեմբերին 2020 թվականի նույն ժամանակահատվածի համեմատ աճել է 12.8 տոկոսով, Հայաստանից Միության երկրներ արտահանման մատակարարումների ծավալն այս տարվա առաջին ինն ամիսներին աճել է 27.8 տոկոսով։
«Աճ է գրանցվում ԵԱՏՄ-ի բոլոր գործընկերների հետ. դեպի Ռուսաստան արտահանումն աճել է 27.4 տոկոսով, դեպի Բելառուս՝ 19.2 տոկոսով, դեպի Ղազախստան՝ 89.5 տոկոսով, Ղրղզստան՝ 48 տոկոսով։
Սա վկայում է ոչ միայն ԵԱՏՄ շրջանակներում առեւտրային համագործակցության զարգացման, այլեւ նոր հնարավորությունների առկայության մասին, որոնք գործարկվել են համաշխարհային տնտեսության գլոբալ կառուցվածքային փոփոխությունների համատեքստում»,- նշել է Նիկոլ Փաշինյանը։