Փորձագետները նախազգուշացրել են Տոկիոյի Նարիտա օդանավակայանի տարածքում կրիաների պոպուլյացիայի աճի մասին։ Կենդանիները վտանգ են ներկայացնում թռիչքների համար, տեղեկացնում է «Մոյա պլանետա» պորտալը՝ հղում կատարելով NHK-ին։
Սեպտեմբերին օդանավակայանի թռիչքուղիներից մեկը ժամանակավորապես փակվել էր հսկայական կրիայի պատճառով, որը շարժվում էր թռիչքուղով։ Մասնագետների կարծիքով՝ կենդանին կարմրականջ, քաղցրահամ ջրերում ապրող կրիաների տեսակին է պատկանում, որը հայտնի է իր վերարտադրողական բարձր ունակությամբ։ Այս տեսակը օդանավակայանի տարածքում նախկինում չէր եղել։ Օդանավակայանի ներկայացուցիչները կարծում են, որ կրիաները կարողացել են այնտեղ հայտնվել անձրեւաջրերի ջրամբարի պատճառով, որը գտնվում է թռիչքուղու հարեւանությամբ։
Լրագրողներն այցելել են ջրամբար, որտեղ հայտնաբերել են մեծ թվով կրիաներ։ Պարզվել է, որ ջրամբարի եւ թռիչքուղու միջեւ պատնեշներ չկան։ Ընդ որում՝ օդանավակայանում կրիաների հայտնվելու մասին տեղեկություններն սկսել են ավելանալ։ Ավիացիայի գծով փորձագետը նախազգուշացրել է, որ հարկավոր է որքան հնարավոր է արագ միջոցներ կիրառել, որպեսզի կենդանիները չհայտնվեն թռիչքուղում։ Կրիաներն ամուր զրահ ունեն, ուստի դրանք անգամ շատ ավելի մեծ սպառնալիք են ստեղծում ինքնաթիռների համար, քան երբ շարժիչների մեջ թռչուններ են ընկնում։
