TikTok ծառայությունը զգալիորեն ընդլայնում է իր ներկայությունը հեռուստատեսությունում, հայտնում է 3dnews.ru-ն՝ վկայակոչելով The Verge-ը:
Ավելի վաղ հավելվածը հասանելի էր Հյուսիսային Ամերիկայի Amazon Fire TV պլատֆորմի օգտատերերին, իսկ այժմ TikTok-ը գործարկվել է Samsung եւ LG սմարթ հեռուստացույցների, ինչպես նաեւ Android TV սարքերի, այդ թվում՝ Chromecast Google TV-ի վրա:

Թեեւ մեծ տարածում գտած TikTok բջջային հավելվածը կենտրոնացած է ուղղահայաց տեսանյութերի վրա, մեծ էկրանի համար ծրագրային ապահովումն օպտիմիզացված է «տանը հեռուստացույց դիտելու համար` հեշտացնելով For You եւ Follow ալիքներից քոնթենթի դիտումը մեծ էկրանով: Այն ներառում է ամենադիտված տեսանյութերը տարբեր կատեգորիաներում՝ խոհարարությունից եւ հումորից մինչեւ կենդանիների մասնակցությամբ տեսանյութեր: Նշվում է նաեւ, որ TikTok TV-ում օգտատերերը կկարողանան մինչեւ երեք րոպե տեւողությամբ տեսանյութեր գտնել։

Հյուսիսային Ամերիկայից դուրս TikTok TV հավելվածը հասանելի է Samsung հեռուստացույցների, ինչպես նաեւ Մեծ Բրիտանիայի Amazon Fire TV-ի միջոցով: Այս տարվա սեպտեմբերին TikTok-ի ամսական ակտիվ օգտատերերի թիվը գերազանցել է 1 միլիարդը, իսկ ԱՄՆ-ում Android-ով սարքերի տերերի շրջանում ծառայությունը շրջանցել է YouTube-ը տեսանյութերի դիտման միջին ժամանակով։ Օգտատերերն այժմ ավելի շատ հնարավորություններ կունենան TikTok-ի հետ փոխգործակցության համար, եւ նրանք կկարողանան կարճ տեսանյութեր դիտել իրենց հեռուստացույցներով: