Իրանի անդամակցությունը ԵԱՏՄ-ին լուրջ հակակշիռ կստեղծի Թուրքիային։ Այս մասին NEWS.am-ին տված հարցազրույցում ասաց Հայաստանի գործատուների հանրապետական միության նախագահ Գագիկ Մակարյանը։
«Այսօր, քանի որ Իրանը գտնվում է պատժամիջոցների տակ, Թուրքիան իրանական ապրանքները վերավաճառում է իր անվան տակ։ Թուրքիայի վաճառածի մեծ մասը իրականում իրանական արտադրության է: Թուրքիան չունի այն ներուժը, որը փորձում է ցույց տալ։ ԵՏՄ-ին միանալը թույլ կտա Իրանին իր արտադրանքը վաճառել։ Մյուս կողմից, ԱՄՆ պատժամիջոցները թուլանում են, ինչն էլ ավելի կամրապնդի Հայաստանի դիրքերը։ Իրանի անդամակցումը ԵԱՏՄ-ին Իրանի հետ առեւտուրը 400 միլիոն դոլարից կհասցնի 1 միլիարդ դոլարի, ինչի մասին շատ է խոսվում»,-ընդգծեց նա։
Մակարյանը նկատեց, որ այդպիսով կբարձրանա Հայաստանի տարանցիկ ներուժը, քանի որ մեր երկրի տարածքով իրանական ապրանքները կարող են ուղարկվել Միության պետություններ։
«Այս դեպքում Իրանը շահագրգռված կլինի Հայաստանում արտադրություն հիմնել, որպեսզի դյուրացնի իր արտադրանքի մուտքը երրորդ երկրների շուկա։ Հզոր արդյունաբերական բազա ունեցող 80 միլիոն բնակչությամբ երկիրը լավ հնարավորություններ կստեղծի Միությունում արդյունաբերության զարգացման համար»,-հավելեց փորձագետը։
