Apple-ը հայտարարել է, որ կշարունակի պետական մարմինների կողմից կիբեռգրոհների զոհ դարձած օգտատերերին ծանուցելու պրակտիկան: Ընկերությունը մանրամասն նկարագրել է այն մեխանիզմները, որոնց միջոցով իր սարքերի տերերին կտեղեկացնի նման միջադեպերի մասին, հայտնում է 3dnews.ru-ն՝ հղում անելով Engadget-ին։

Նման կիբեռհարձակումների թիրախ դարձած օգտատերը համապատասխան ծանուցումներ կստանա էլեկտրոնային փոստով, ինչպես նաեւ iMessages-ով՝ ուղարկելով անհրաժեշտ տեղեկատվություն Apple ID-ի հետ կապված հասցեներին եւ հեռախոսահամարներին։ Այցելելով appleid.apple.com՝ օգտատերը կստանա նաեւ «սպառնալիքի մասին ծանուցում»՝ մանրամասնելով, թե ինչ է տեղի ունեցել եւ երբ:

Ընկերությունն ընդգծել է, որ այս ծանուցումներով երբեք խորհուրդ չի տրվի սեղմել հղման վրա, ներբեռնել բովանդակություն կամ տարածել մուտքի տվյալներ, ներառյալ գաղտնաբառեր եւ հաստատման ծածկագրեր, բոլոր մանրամասները կտրամադրվեն միայն Apple ID էջում: Apple-ը տրամադրել է նաեւ ռեսուրսների ցանկ, եթե օգտատերը վստահ է, որ հարձակման է ենթարկվել, սակայն համապատասխան ծանուցում չի ստացել։

Այս պրակտիկան նոր չէ։ Օրինակ, Google-ը տարիներ շարունակ ծանուցում է իր օգտատերերին, երբ կիբեռհարձակումների փաստերի հաստատում է ստանում։ Apple-ի բացատրությունները, ըստ երեւույթին, արդիական են NSO Group-ի եւ այլ մշակողների կողմից լրտեսող ծրագրերի վերաբերյալ մտահոգությունների լույսի ներքո․ նման գործիքները երբեմն օգտագործվում են ամբողջ աշխարհի պետական գերատեսչությունների կողմից՝ ակտիվիստներին եւ այլախոհներին հալածելու համար: Հիշեցնենք՝ վերջերս հայտնի դարձավ, որ Apple-ը դատական հայց է ներկայացրել իսրայելական NSO Group-ի դեմ։