Կորոնավիրուսի B.1.1.529 նոր շտամով վարակման առաջին դեպքը գրանցվել է Իսրայելում՝ Մալավիից վերադարձած քաղաքացու մոտ։ Այս մասին ուրբաթ հայտնել է Իսրայելի առողջապահության նախարարության մամուլի ծառայությունը, փոխանցում է ՏԱՍՍ-ը։
«Հարավային Աֆրիկայի մի շարք երկրներում հայտնաբերված [կորոնավիրուսի] շտամը հայտնաբերվել է Իսրայելում։ Դա Մալավիից վերադարձած քաղաքացի է։ Բացի այդ, կասկածներ կան արտերկրից վերադարձած [քաղաքացիների] եւս երկու դեպքի վերաբերյալ, ովքեր այս պահին մեկուսացված սպասում են թեստի արդյունքներին»,- ասված է հաղորդագրությունում։
Մամուլի ծառայությունից հավելել են, որ վարակվածների բոլոր հնարավոր շփումները պարզելու համար համաճարակաբանական հետաքննություն է սկսվել։ Առողջապահության նախարարությունը նշել է, որ «երեք դեպքում էլ խոսքը պատվաստված հիվանդների մասին է», եւ որ «նրանց իմունիզացման տվյալները ներկայումս ճշտվում են»։