Պահանջում ենք վարչապետ Նիկոլ Փաշինյանի գլխավորած կառավարության հրաժարականը եւ ժամանակավոր կաբինետի ձեւավորում։ Այս մասին նոյեմբերի 29-ին լրագրողների հետ հանդիպման ժամանակ հայտարարեց «5165» շարժման անդամ Մենուա Սողոմոնյանը։
Այս պահանջը, նրա խոսքով, կապված է Հայաստանի եւ Ղարաբաղի անվտանգությանը սպառնացող քայլերի շարունակությունը կանխելու մտադրության հետ։ Նա նշեց, որ Փաշինյանը ստորագրել է մի փաստաթուղթ, որի մանրամասները Ազատագրական շարժումը վաղուց էր պահանջում հրապարակել։ Փաստաթղթի էությունը սահմանազատման եւ սահմանագծման գործընթացի հիմքում ընկած մեխանիզմներն են, որի մասին հետագայում հայտարարեց Ռուսաստանի նախագահը։
Կարեւոր հարցերի վերաբերյալ միանձնյա որոշումներ կայացնելը գործադիր իշխանության կողմից՝ առանց իշխանության մյուս ճյուղերի մասնակցության, անօրինական է։ Մենք պատրաստվում ենք հանդիպումներ ունենալ բոլոր քաղաքական ուժերի եւ հասարակական կազմակերպությունների ներկայացուցիչների հետ, որոնք համաձայն են Կառավարության հրաժարականի պահանջին։ Դրանով է պայմանավորված փողոցային պայքարը քաղաքական կոնսուլտացիաների փուլ տեղափոխելու որոշումը՝ հետագայում այն էլ ավելի մեծ եռանդով վերսկսելու համար։ Ազատագրական շարժման շրջանակներում մեր համատեղ քայլերը պայմանավորված են հասարակության համախմբման անհրաժեշտությամբ։ Դրա համար քաղաքական ուժերն ու անհատները պետք է մի կողմ դնեն իրենց ամբիցիաները»,-ասաց նա։
«5165» շարժման առաջնորդ Կարին Տոնոյանն իր հերթին վստահեցրեց, որ Ազատագրական շարժման անդամների հետ խնդիրներ չեն եղել, պառակտում չի եղել։ Նրա խոսքով՝ այս փուլում հնարավոր եղավ հասնել դրված նպատակին՝ ցույց տալ այդ թվում արտաքին աշխարհին, որ Հայաստանում կան ուժեր, որոնք դեմ են այս փաստաթղթի ստորագրմանը։
«Մարդիկ չեն ցանկանում փողոց դուրս գալ, հանրահավաքներ անել, քանի որ հասարակությունը պառակտված է։ Մի խումբն աջակցում է մի ուժին, մյուսը՝ մյուս ուժին եւ այլն։ Բայց մենք պայքարի դուրս չենք գալիս, որ մեզ սիրեն, այլ դա անում ենք հանուն Հայաստանի։ Մենք ազգային համաձայնություն ձեւավորելու անհրաժեշտություն ենք տեսնում, եւ հստակ պատկերացումներ ունենք այս հարցում։ Ես անձամբ չեմ տեսնում հեռանկար, որ Հայաստանի նախկին նախագահներից որեւէ մեկը կարող է գլխավորել ժամանակավոր կառավարությունը։ Նրանք պետք է ընդունեն իրենց սխալները եւ միասնաբար երկիրը դուրս բերեն այս վիճակից։ Ժողովուրդը հենց դրան է սպասում։
Նրանք ծանոթ են 30 տարվա ընթացքում մեր երկրի առջեւ ծառացած խնդիրներին։ Ցանկացած նոր ուժ, որը գալիս է իշխանության, պետք է խորհրդակցի. Ուրիշ ինչպե՞ս հաղթահարել ճգնաժամը»,-հավելեց նա։
Մենուա Սողոմոնյանն էլ բացատրեց, որ ժամանակավոր կառավարության առջեւ պետք է կարեւոր խնդիր դրվի՝ կապված անվտանգության խնդիրների լուծման համար ռեսուրսների մոբիլիզացման հետ։ «Միեւնույն ժամանակ, Նիկոլ Փաշինյանը չի կարող լինել վարչապետի պաշտոնակատար, քանի որ նա անհատական որոշումներ է կայացնելու, եւ նման հեռանկարն անընդունելի է»,-ընդգծեց նա։
Շարժման անդամները նշեցին, որ անհրաժեշտ է ներգրավել մարդկանց, ովքեր քաջատեղյակ են ղարաբաղյան հիմնախնդրի կարգավորման բարդություններին, ինչպես նաեւ գործին ներգրավել նախկին վարչապետներին, որոնք կարող են նպաստել տնտեսական ճգնաժամի հաղթահարմանը։
Հիշեցնենք, որ ավելի վաղ «5165» շարժումը հայտարարել էր պայքարը Ազատագրական շարժումից առանձին շարունակելու մասին, որը վերջին օրերին բողոքի ակցիաներ էր կազմակերպել՝ պահանջելով հրապարակել փաստաթղթի բովանդակությունը, որն ի վերջո ստորագրվել էր նոյեմբերի 26-ին Սոչում Հայաստանի, Ադրբեջանի եւ Ռուսաստանի ղեկավարների կողմից։