Կոլումբիայի իշխանությունները հարյուրավոր վայրի սարդեր եւ միջատներ են առգրավել այդ միջատներին մաքսանենգ ճանապարհով Եվրոպա տեղափոխելու փորձի ժամանակ, հայտնում է Reuters-ը։
Բոգոտայի բնապահպանական գերատեսչության հայտարարության մեջ նշվում է, որ առնվազն 232 տարանտուլա սարդ, 67 ուտիճ, սարդի ինը ձու եւ կարիճ՝ յոթ ձագերով, առգրավվել են մայրաքաղաքի Էլդորադո օդանավակայանում: Միջատները պահվել են ճամպրուկների մեջ թաքցրած ավելի քան 200 պլաստիկ տարաներում, ասվում է հաղորդագրության մեջ։
Հաղորդվում է, որ Գերմանիայի երկու քաղաքացիներ բերման են ենթարկվել, որոնք քրեական պատասխանատվության կենթարկվեն։ Նրանք հայտնել են, որ կենդանիներին Գերմանիա են տանում ակադեմիական նպատակներով, բայց դրանց հավաքելու եւ տեղափոխելու թույլտվություն չունեին։
Բոգոտայի շրջակա միջավայրի նախարար Կարոլինա Ուրուտիան ասել է, որ նույնիսկ եթե մարդիկ մտադիր են օգտագործել վայրի կենդանիներին գիտական հետազոտությունների համար, այնուամենայնիվ, դրանք երկրից դուրս տանելու համար համապատասխան մարմինների թույլտվություն է հարկավոր:
