Կոլումբիական Gulf Clan թմրակարտելը վերահսկում է Պանամայով տեղափոխվող կոկաինի խմբաքանակի կեսից ավելին եւ գլոբալ տրանսպորտային հանգույցում ստեղծել է լոգիստիկ եւ փողերի լվացման լայն ցանց, հայտնում է AP-ն։
Պանամայի ոստիկանապետ Ջոն Դորնհեյմը հայտարարել է, որ կարտելը ներթափանցում է երկրի բիզնես հատված: «Տարեկան յոթ միլիոն կոնտեյներ շարժվում է երկրի նավահանգիստներով, երկուսը՝ Խաղաղ օվկիանոսի ափին եւ երեքը Կարիբյան ավազանում, եւ դա խթանում է երկրի օրինական տնտեսությունը»,-ասել է Դորնհեյմը։
Նրա խոսքով՝ Պանամայում սպանությունների 70%-ը կապված է թմրամիջոցների ապօրինի շրջանառության հետ։
Հայտարարությունները հնչել են մի քանի օր անց այն բանից հետո, երբ Պանամայի իշխանությունները տարբեր ռեյդերների ժամանակ առգրավել են 10 միլիոն դոլար կանխիկ գումար եւ ձերբակալել 57 մարդու: Ձերբակալվածների թվում են պետական պաշտոնյաներ եւ անվտանգության ուժերի ներկայացուցիչներ։
Անվտանգության նախարար Խուան Մանուել Պինոն ասել է, որ հնարավոր են նոր ձերբակալություններ, քանի որ Պանամայում կարտելի ցանցի ծավալները բացահայտված չեն։