ՌԴ ԱԳՆ ղեկավար Սերգեյ Լավրովն Ուկրաինայի ղեկավարության վերջին հայտարարություններն անվանել է «գիտակցության հոսք»՝ նշելով, որ Կիեւն իր դիրքորոշումն օրական մի քանի անգամ փոխում է, փոխանցում է «ՌԻԱ Նովոստի»-ն։
Լավրովը նշել է․ «Ուկրաինայի ղեկավարության կազմում որքան մարդ, այնքան՝ կարծիք, եւ նրանցից յուրաքանչյուրը կարող է օրական մի քանի անգամ փոխել իր կարծիքը»։
«Եվ նույն ինքը՝ պարոն (Ուկրաինայի նախագահ Վլադիմիր) Զելենսկին, եւ նրա նախարարը…։ Ահա նրանք ունեն պաշտպանության նոր նախարար (Ալեքսեյ Ռեզնիկով), որը փոխվարչապետ էր։ Երեկ, կարծես, ասաց, որ Ուկրաինան պետք է հրավիրի կամ արդեն հրավիրել է անգլիացիների, կանադացիների եւ ամերիկացիների Դոնբաս՝ առաջնագիծ։ Երկու ժամ անց նա ասաց, որ չեն հրավիրի։ Ըստ ամենայնի՝ ավագ ընկերները նրան բացատրեցին, որ արդեն չափն անցել է»,-ասել է ՌԴ ԱԳՆ ղեկավարը՝ նման գործընթացներն անվանելով գիտակցության հոսք։
Ավելի վաղ՝ կիրակի, Ուկրաինայի պաշտպանության նախարարը հայտարարել է, որ Մեծ Բրիտանիան, Կանադան եւ Միացյալ Նահանգները պետք է իրենց զորքերը տեղակայեն երկրի այն տարածքներում, «որոնք կարող են դառնալ առաջնագիծ Ռուսաստանի լայնածավալ հարձակման դեպքում»։ Ավելի ուշ Ռեզնիկովն ինքն իրեն ուղղել է՝ ասելով, որ Ուկրաինային «ամերիկացի զինվորներ պետք չեն, իրենց պետք է զենք» եւ այլն։
