Վրաստանի նախկին նախագահ Միխեիլ Սաակաշվիլին, ով գտնվում է Գորի քաղաքի զինվորական հոսպիտալում, հայտարարել է, որ կդադարեցնի բուժումն այնքան ժամանակ, քանի դեռ չեն բավարարվել Պետական տեսուչի ծառայության կողմից Արդարադատության նախարարության եւ Հատուկ քրեակատարողական ծառայության նկատմամբ սահմանված պատժամիջոցները։
Պետական տեսուչի որոշմամբ, գործող օրենսդրության համաձայն, Հատուկ քրեակատարողական ծառայությունը տուգանվել է 2 հազար լարիով, իսկ արդարադատության նախարարությունը՝ 500 լարիով՝ Սաակաշվիլիի հետ կապված անձնական տվյալների պաշտպանության մասին օրենքի խախտման համար։ Գործակալություններին հանձնարարվել է հեռացնել բանտում գտնվող Սաակաշվիլիի ձայնա եւ տեսագրությունները Facebook սոցցանցից, ինչպես նաեւ` պաշտոնական վեբ կայքերից:
«Ես դադարեցնում եմ բոլոր բուժումները եւ չեմ դադարեցնի բողոքի ակցիան, քանի դեռ պետական տեսուչի ծառայության որոշումները չեն կատարվել, չեն չեղարվել, այսպես կոչված, կարգապահական միջոցները եւ չեն վերսկսվել բնականոն այցելությունները»,- ասվում է Facebook սոցցանցում նախկին նախագահի էջին հրապարակված նամակում։
Նախագահի խոսքով, որպես կարգապահական տույժ, իրեն զրկել են հեռուստացույցից եւ թույլ չեն տվել այցելուներին տեսնել իրեն, քանի որ նոյեմբերի 8-ին իր կամքին հակառակ բանտային հիվանդանոց տեղափոխելիս նա շրջել է արյան ճնշման մոնիտորի սարքը։
Հատուկ քրեակատարողական ծառայությունն արդեն հերքել է Սաակաշվիլիի հայտարարությունները։
«Նրա հետ հանդիպումները սահմանափակելու եւ հեռուստացույցից զրկելու մասին տարածված տեղեկատվությունը սուտ է եւ վնասում է գերատեսչության իմիջին հասարակության շրջանում»,- ասվում է ծառայության հաղորդագրության մեջ։
Քրեակատարողական ծառայությունը հորդորել է նախկին նախագահին զերծ մնալ կեղծ մեղադրանքներ տարածելուց։
50-օրյա հացադուլից հետո Սաակաշվիլին Գորիի զինվորական հոսպիտալում վերականգնողական կուրս է անցնում։ Ավելի վաղ Վրաստանի արդարադատության նախարարությունը հայտնել էր, որ բուժման ավարտից հետո Սաակաշվիլիին կվերադարձնեն Ռուսթավի քաղաքի թիվ 12 բանտ, ուր նա տեղափոխվել էր հոկտեմբերի 1-ին ձերբակալելուց անմիջապես հետո։
