Դպրոցական աղջիկը Ավստրալիայից կարողացել է ազատվել շնաձկից եւ օգնել է 16-ամյա երիտասարդին, որը նույնպես քիչ էր մնում դառնար շնաձկան զոհը, տեղեկացնում է Gazeta-ն՝ հղում կատարելով Daily Mail-ին։
Ինչպես պատմել են ականատեսները, նրանք լսել են ծովում լողացող երկու դեռահասների ճիչերը։
«Սկզբում մտածեցինք, որ նրանք խաղում են, իսկ հետո սկսեցին բղավել, որ իրենց վրա շնաձուկ է հարձակվել»,- ասել է ափից տեղի ունեցողին հետեւող Փիթեր Հոբսը։
Աղջկան հաջողվել է հետ մղել շնաձկանը, դուրս լողալ ափ եւ օգնել ընկերոջը, որն ավելի թեթեւ վնասվածքներ էր ստացել։ Տուժածներին առաջին օգնություն է ցուցաբերել Փիթերի կինը՝ Դիանան, որը բուժքույր է, իսկ մի քանի րոպե հետո լողափ են եկել բժիշկները։
«Շնաձուկը կծել էր աղջկա ոտքը եւ ձեռքը, տղայի մեջքն էր քերծել»,- ասել է Դիանան։
Տղային հիվանդանոցից դուրս են գրել հաջորդ օրը, բայց նրա ընկերուհին դեռեւս բժիշկների խնամքի տակ է։ Տեղի իշխանությունները հաստատել են միջադեպը եւ փակել լողափը, որտեղ տեղի է ունեցել շնաձկան հարձակումը։
«Ոչ ոք չկարողացավ նկարագրել, թե հատկապես ինչ շնաձուկ էր հարձակվել դեռահասների վրա, բայց ձկնորսության աշխատակիցները կզրուցեն զոհերի հետ, որպեսզի ավելի ստույգ տեղեկություն ունենան»,- ասվում է հայտարարությունում։
