Դաշինքի արեւելյան հարեւանների հետ ԵՄ գագաթաժողովը կհաստատի ԵՄ-ին անդամակցելու իրենց ձգտումներում Վրաստանին, Մոլդովային եւ Ուկրաինային աջակցությունը, բայց չի խոստանա նրանց ընդգրկել դաշինքում: Այս մասին հայտնում է Reuters-ը՝ հղում անելով ամփոփիչ հայտարարության նախագծին։

Դեկտեմբերի 15-ին կայանալիք ԵՄ գագաթաժողովին կմասնակցեն Հայաստանը, Ադրբեջանը, Վրաստանը, Մոլդովան եւ Ուկրաինան։ Նախկին խորհրդային հանրապետություններ Վրաստանը, Մոլդովան եւ Ուկրաինան ցանկանում են մի օր անդամակցել ԵՄ-ին։ Հուլիսին եռյակը ԵՄ ինտեգրման ուղղությամբ համատեղ աշխատելու հայտարարություն է ստորագրել:

Գագաթաժողովի հայտարարության նախագծից հատվածների համաձայն՝ ԵՄ-ն «ճանաչում է շահագրգիռ գործընկերների եվրոպական նկրտումները եւ եվրոպական ընտրությունը»։

Դա նույն լեզուն է, որն օգտագործվել է Արեւելյան գործընկերության 2017 թվականի գագաթաժողովի վերջին եզրափակիչ հայտարարության մեջ՝ չնայած շուկայական տնտեսության բարեփոխումները արագացնելու եւ ԵՄ-ին միանալու Վրաստանի, Մոլդովայի եւ Ուկրաինայի վճռականությանը:

Վրաստանն ու Ուկրաինան նույնպես ձգտում են անդամակցել ՆԱՏՕ-ին։

Քանի որ ներգաղթի նկատմամբ քաղաքական թշնամանքը մեծանում է, ԵՄ-ն չի ցանկանում ընդլայնվել:

Բալկանյան վեց երկրներ, ինչպիսիք են Սերբիան, Կոսովոն, Բոսնիա եւ Հերցեգովինան, Չեռնոգորիան, Ալբանիան եւ Հյուսիսային Մակեդոնիան պաշտոնական եվրոպական «հեռանկար» ունեն։

Արեւելյան գործընկերության երկրների համար ԵՄ-ն առաջարկում է գումար, տեխնիկական աջակցություն եւ շուկայի լայն հասանելիություն՝ Թբիլիսիի, Քիշնեւի եւ Կիեւի հետ ազատ առեւտրի համաձայնագրեր կնքելով՝ ԵՄ ժողովրդավարական, վարչական եւ տնտեսական նորմերի ընդունման դիմաց:

Գագաթաժողովում, հավանաբար, կասվի, որ ազատ առեւտրի մասին այս համաձայնագրերը «Եվրամիության հետ քաղաքական ասոցացման եւ տնտեսական ինտեգրման արագացում են նախատեսում»:

Գագաթաժողովի հայտարարությունը կբացի նաեւ Բելառուսի հետ ապագայում հարաբերությունների բարելավման հնարավորություն, «հենց որ ժողովրդավարությանը խաղաղ անցման անհրաժեշտ պայմաններ ստեղծվեն»։