Վարչապետ Նաֆթալի Բենեթը նախատեսում է զգուշավոր գործել, երբ խոսքը վերաբերում է Անկարայի հետ հարաբերությունների ջերմացման հնարավորությանը այն բանից հետո, երբ Թուրքիայի նախագահ Ռեջեփ Թայիփ Էրդողանը բազմիցս մերձեցման հույս է հայտնել, գրել է Jerusalem Post-ը։
«Վարչապետն ասաց, որ հատկապես Օկնինների գործից հետո պետք է դանդաղ գործենք։ Ոչ մի որոշում չի ընդունվել, սակայն բանակցությունները շարունակվում են»,- ասել է բարձրաստիճան դիվանագիտական աղբյուրը՝ նկատի ունենալով իսրայելցի զբոսաշրջիկներին, որոնք անցյալ ամիս ձերբակալվել էին Ստամբուլում Էրդողանի պալատը լուսանկարելու համար եւ ազատ արձակվել Իսրայելի դիվանագիտական ակտիվությունից մեկ շաբաթ անց:
Բենեթը եւ արտաքին գործերի նախարար Յաիր Լապիդը համաձայնել են, որ Էրդողանի վերջին առաջարկներին արագ եւ ակտիվ արձագանքը կարող է տպավորություն ստեղծել, որ իրենց ճնշման կամ նույնիսկ շանտաժի են ենթարկվում ՝ կապված Օկնինների ձերբակալության եւ նրանց ազատ արձակման հետ:
Էրդողանը չորեքշաբթի հայտարարել է, որ Իսրայելը եւ Թուրքիան կարող են վերադարձնել դեսպաններին, եթե Իսրայելը փոխի ուղղությունը այն ոլորտներում, որոնք Թուրքիան դիտարկում է որպես կարմիր դրոշներ, մասնավորապես՝ Երուսաղեմում եւ Ալ-Աքսա մզկիթում: «Ես նախկինում բանակցել եմ Իսրայելի հետ, սակայն Իսրայելը պետք է ավելի զգայուն լինի Պաղեստինի հարցում», - ասել է Էրդողանը։
Իսրայելը սերտ կապեր է զարգացրել Հունաստանի եւ Կիպրոսի՝ Թուրքիայի պատմական հակառակորդների հետ՝ հիմնվելով էներգետիկայի եւ պաշտպանության վրա: Իսրայելը, Հունաստանը եւ Կիպրոսը աշխատում են բնական գազի հանքավայրերի զարգացման վրա։ Հունաստանի վարչապետ Կիրիակոս Միցոտակիսը եւ Կիպրոսի նախագահ Նիկոս Անաստասիադեսն այս շաբաթ Երուսաղեմում իրենց հրապարակային հայտարարություններում Թուրքիայի դեմ են հանդես եկել։
Բենեթը Հունաստանի եւ Թուրքիայի հետ Իսրայելի սերտ կապերը դիտարկում է որպես «նախորդ կառավարության գործողություններից մեկը, որը իրենք ուրախ կլինեն շարունակել», - նշել է աղբյուրը՝ ընդգծելով EastMed գազատարի կառուցման կարեւորությունը: «Մենք անընդհատ խոսում ենք Իրանի մասին, եւ նույն բանը Թուրքիայի դեպքում է: Դիվանագիտական հարաբերությունները պահանջում են որոշակի հավատարմություն»,- հայտարարել է բարձրաստիճան դիվանագիտական աղբյուրը։
Բացի այդ, իսրայելցի շատ պաշտոնյաներ չեն հավատում Էրդողանի մտադրություններին։ Միեւնույն ժամանակ, Բենեթի որոշ խորհրդականներ ասում են, որ Թուրքիայի հետ հարաբերությունների բարելավումը ռազմավարական նշանակություն ունի։ «Ոչ ոք չի խոսում գերտաք կապեր ունենալու մասին, - պարզաբանել է աղբյուրը,- սակայն գուցե կարող ենք մի փոքր բարձրացնել «ջերմաստիճանը»: Սա դիլեմա է»:
