Չնայած այն հանգամանքին, որ Հին Եգիպտոսի դամբարանների մեծ մասը հայտնաբերվել կամ թալանվել են քսաներորդ դարի սկզբին, հնագետները մինչ օրս զարմանալի գտածոներ են հայտնաբերում: Հաճախ տեղեկատվության կորստի պատճառով մի քանի հազարամյակների ընթացքում ծագած հանելուկները կարող են լուծվել միայն ժամանակակից գիտության շնորհիվ, հաղորդել է Planet-today-ը։
Անսովոր գտածոն հայտնաբերվել է անցյալ տարի Դախշուրում՝ Նեղոսի արեւմտյան ափին գտնվող անապատում՝ Կահիրեից մոտ 40 կիլոմետր հեռավորության վրա գտնվող թագավորական նեկրոպոլիսում։ Դամբարանի ներսում հայտնաբերված արտեֆակտների եւ մասունքների շարքում հնագետները հայտնաբերել են սարկոֆագ, որն ի սկզբանե ենթադրվում էր, որ պատկանում է փարավոնի՝ հաշվի առնելով փաստը, որ այն տեղադրված էր բուրգի ներսում, քանի որ բրգաձեւ դամբարանները նախատեսված էին տիրակալների համար:
Հետազոտողները եգիպտագետ դոկտոր Յասմին Էլ-Շազլիի գլխավորությամբ հավաքել են փայտի բազմաթիվ կտորներ, որոնք ցրված էին հուղարկավորության խցում: Երբ «փազլը» հավաքվեց, պարզվեց, որ այն սարկոֆագի կափարիչ է՝ դեմքի տեսքով հարթաքանդակով։ «Սարկոֆագների վերին հատվածքները հաճախ ունեին այնպիսի հատկանիշներ, ինչպիսին դրանց տերերն էին», - մեկնաբանել է դոկտոր Շազլին:
Հետազոտողները գործի են անցել՝ լիովին վստահ լինելով, որ փարավոնի մումիան գտնվում է սարկոֆագում։ Սակայն պարզվել է, որ դա այդպես չէ։ Իրականում թագավորական դամբարանում անհայտ կնոջ մումիա է եղել։
Դամբարանում գտնվող սարկոֆագի կողքին հայտնաբերվել է սնդուկ՝ ծածկված հիերոգլիֆներով, որոնք, հետազոտողները հույս ունեին, որ կօգնեն ավելին իմանալ կնոջ անձի մասին:
Ցավոք, արձանագրության այն տեղը, որտեղ պետք է լիներ կնոջ անունը, գործնականում չի պահպանվել։ Սակայն հնագետները կարողացել են կարդալ, որ նա «թագավորի դուստրն է եղել»։ Սակայն մինչ այժմ առեղծված է մնում նրա անունը, ինչպես նաեւ պատճառը, թե ինչու է նա հուղարկավորվել թագավորական դամբարանում։
