Վիետնամը 2022 թվականի հունվարի 1-ից կսկսի կանոնավոր չվերթների վերականգնումն այլ երկրների հետ, որոնք ընդհատվել էին անցյալ տարվա մարտին համավարակի պատճառով, հայտնում է ՏԱՍՍ-ը։
Համապատասխան հրամանագիրը ստորագրել է հանրապետության կառավարության առաջին փոխվարչապետ Ֆամ Բին Մինը, շաբաթ օրը հայտնել են Վիետնամի կաբինետի գրասենյակից։
Ինչպես նշվում է փաստաթղթում, սկզբնական փուլում կվերսկսվեն կանոնավոր առեւտրային թռիչքները համավարակային անվտանգության, ինչպես նաեւ տեղի բնակչության պատվաստումների բարձր մակարդակ ունեցող երկրների եւ տարածքների հետ:
Դրանց թվում են Կամբոջան, Չինաստանը, Լաոսը, Կորեայի Հանրապետությունը, Սինգապուրը, ԱՄՆ-ը, Թաիլանդը, Ճապոնիան եւ Չինաստանի Թայվան նահանգը:
Այս շաբաթվա սկզբին վիետնամական բոլոր ավիաընկերությունները եւ տեղական օդանավակայաններում ցամաքային ծառայություններ մատուցող ձեռնարկությունները կոչ էին արել կառավարությանը որքան հնարավոր է շուտ վերականգնել միջազգային թռիչքները: Վարչապետ Ֆամ Մին Չինին ուղղված ուղերձում ավիացիոն արդյունաբերության ներկայացուցիչները զգուշացրել են երկրին սպառնացող վտանգների մասին, եթե թռիչքները շուտով չվերսկսվեն։ Եթե բացման քաղաքականության իրականացումը չափազանց դանդաղ լինի, ապա Վիետնամը կարող է կորցնել իր մրցակցային շատ առավելություններ ոչ միայն զբոսաշրջիկների, այլեւ ներդրողների աչքում, ասվում է կոչում։
Անցյալ տարվա մարտից Վիետնամի սահմանները համավարակի պատճառով փակ են օտարերկրյա քաղաքացիների մեծ մասի համար: Հանրապետություն կարող են մուտք գործել միայն դիվանագիտական եւ ծառայողական անձնագրեր ունեցող օտարերկրացիները, ինչպես նաեւ` որոշակի առաջնահերթ կատեգորիաների ներկայացուցիչներ։