Մրցակցության պաշտպանության հանձնաժողովը կփորձի պարզել, թե Երեւանի «Զվարթնոց» օդանավակայանում ինչ գնով են կատարվում ՊՇՌ թեստերը։ Այս մասին դեկտեմբերի 28-ին լրագրողների հետ զրույցում ասաց մրցակցության պաշտպանության հանձնաժողովի նախագահ Գեղամ Գեւորգյանը՝ ամփոփելով անցնող տարվա արդյունքները։
Պաշտոնյայի խոսքով՝ հանձնաժողովն ուսումնասիրում է ինչպես օդանավակայանի շենքում համապատասխան տարածքները վարձակալած լաբորատորիաների, այնպես էլ օդանավակայանի ղեկավարության քաղաքականությունը։
«Մենք կուսումնասիրենք այս շուկան՝ հաշվի առնելով այն, թե որքան կարեւոր է այն ուղեւորների համար, ընդ որում՝ թե՛ մեր, թե՛ հանրապետության հյուրերի համար։ Այս շուկայում մրցակցությունը սահմանափակ է, քանի որ շատ դեպքերում ուղեւորները մեկնելուց եւ ժամանելուն պես պետք է կորոնավիրուսի թեստ հանձնեն։ Հանձնաժողովի խնդիրն է պարզել, թե արդյոք լաբորատորիաները եւ օդանավակայանի ղեկավարությունը չարաշահել են իրենց դիրքը»,-պարզաբանեց Գեւորգյանը։
