Հնդկաստանում 2021 թվականին ռեկորդային թվով վագրեր են սպանվել։ Վագրերի պահպանության հնդկական մարմինը հայտնել է, որ 2021 թվականին ոչնչացման եզրին գտնվող 126 մեծ կատու է սպանվել, ինչը ամենաբարձր ցուցանիշն է տասը տարի առաջ տվյալների հավաքագրման սկսվելուց ի վեր:

Նախկին տարեկան մահացությունների առավելագույն թիվը՝ 121 վագր, եղել է մինչ Վագրերի պահպանության ազգային վարչությունը (NTCA) 2016 թվականին կսկսեր տվյալների հավաքագրումը:

Հնդկաստանում ապրում է աշխարհի վագրերի մոտ 75 տոկոսը: Համարվում է, որ անկախության նվաճման ժամանակ՝ 1947 թվականին, երկրում եղել է մոտ 40 000 վագր, սակայն որսը եւ բնակության վայրերի կորուստը նրանց թիվը հասցրել է վտանգավոր ցածր մակարդակի:

2010 թվականին Հնդկաստանը եւ 12 այլ երկրներ մինչեւ 2022 թվականը վագրերի թիվը կրկնապատկելու մասին համաձայնագիր են ստորագրել: Անցյալ տարի կառավարությունը հայտարարել էր, որ ժամանակից շուտ է հասել նպատակակետին, ըստ գնահատականների՝ 2018-ին եղել է 2967 վագր՝ 2006-ի 1411 արարածի ռեկորդային նվազագույնի համեմատ:

Այս թիվը դեռեւս ավելի ցածր է, քան 2002 թվականին, երբ վագրերի պոպուլյացիան կազմում էր մոտ 3700, սակայն վարչապետ Նարենդրա Մոդին այն անվանել է «պատմական» ձեռքբերում:

Վերջին տասնամյակում վագրերը հիմնականում մահացել են «բնական պատճառներով», սակայն շատերը դարձել են նաեւ որսագողերի եւ «մարդկանց ու կենդանիների հակամարտությունների» զոհ:

Մարդկանց ոտնձգությունները վագրերի կենսական միջավայրերի նկատմամբ վերջին տասնամյակների ընթացքում շատացել է 1,3 միլիարդ բնակչություն ունեցող երկրում:

Կառավարության տվյալների համաձայն, 2014-2019 թվականներին վագրերի հարձակումների հետեւանքով զոհվել է մոտ 225 մարդ:

Wildlife SOS կազմակերպության հիմնադիր Կարթիկ Սաթյանարայանը AFP-ին ասել է, որ մարդկանց եւ կենդանիների միջեւ կոնֆլիկտի հետեւանքով մահվան պատճառը եղել է «վագրի բնական միջավայրի մասնատումը»։ «Վագրերը բնակվում են ջունգլիների հսկայական տարածքներում եւ անհնար են համարում առանց մարդկանց բնակավայրերը հատելու այլ անտառներ գաղթելը, ինչը մեծացնում է հակամարտությունների հավանականությունը»,- ասել է նա:

Քննադատներն ասում են, որ կառավարությունը նաեւ թուլացրել է նախագծերի, ներառյալ հանքարդյունաբերության համար բնապահպանական կանոնակարգերը:

Սաթյանարայանը նաեւ նշել է, որ որսագողության հիմնական պատճառներից են վագրի կաշվի աճող պահանջարկը եւ ավանդական չինական բժշկության մեջ վագրի մարմնի մասերի օգտագործումը։

Կառավարությունը, այնուամենայնիվ, ջանքեր է գործադրել վագրերի պոպուլյացիան ավելի լավ կառավարելու համար՝ ողջ երկրում կենդանիների համար 50 բնակավայրեր ամրագրելով: